ନୂଆଦିଲ୍ଲୀ (ଏଟିଆର ବ୍ୟୁରୋ): କରୋନା ମାମଲା ହ୍ରାସ ପାଇବା ପରେ ମହାରାଷ୍ଟ୍ର ସରକାରଙ୍କ ପକ୍ଷରୁ ଥିଏଟର୍ସ ଖୋଲିବା ପାଇଁ ଅନୁମତି ମିଳିସାରିଛି । ଏହାପରେ ଏବେ ଗୋଟେ ପରେ ଗୋଟେ ବଲିଉଡ ଫିଲ୍ମ ରିଲିଜ୍ ର ତାରିଖ ସାମ୍ନାକୁ ଆସୁଛି । ଆଗକୁ ରିଲିଜ୍ ହେବାକୁ ଥିବା ଫିଲ୍ମ ତାଲିକାରେ ଦୁଇ ବଡ ଷ୍ଟାର ଅକ୍ଷୟକୁମାର ଏବଂ ସାଉଥ ସୁପରଷ୍ଟାର ପ୍ରଭାସଙ୍କ ଫିଲ୍ମ ସାମିଲ ଅଛି ।
ପ୍ରଭାସ ଏବଂ ସୈଫ ଅଲ୍ଲୀ ଖାଁ ଅଭିନୀତ ଫିଲ୍ମ ‘ଆଦିପୁରୁଷ’ ର ରିଲିଜ୍ ତାରିଖ ଘୋଷଣା ହୋଇଯାଇଛି । ୧୧ ଅଗଷ୍ଟ ୨୦୨୨ ରେ ରିଲିଜ୍ ହେବ ଆଦିପୁରୁଷ । ସେହିପରି ଅକ୍ଷୟ କୁମାର ଏବଂ ଭୂମି ପେଡନେକରଙ୍କ ଫିଲ୍ମ ‘ରକ୍ଷା ବନ୍ଧନ’ ମଧ୍ୟ ଏହି ତାରିଖରେ ରିଲିଜ୍ ହେବ । ଆନନ୍ଦ ଏଲ ରୟଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମରେ ଅକ୍ଷୟଙ୍କ ସହିତ ଭୂମି ପେଡନେକର ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ । ଅବଶ୍ୟ ପୂର୍ବରୁ ଏହି ଫିଲ୍ମ ୫ ନଭେମ୍ବର ୨୦୨୧ ରେ ରିଲିଜ୍ ହେବାକୁ ଥିଲା ।
ଫିଲ୍ମ ଆଦିପୁରୁଷ ହିନ୍ଦୀ ଭାଷା ସହିତ ତେଲୁଗୁ, ତାମିଲ, ମାଲୟାଲମ, ଏବଂ କନ୍ନଡ ଭାଷାରେ ମଧ୍ୟ ରିଲିଜ୍ ହେବ । ଓମ ରାଉତଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମରେ ପ୍ରଭାସଙ୍କ ବ୍ୟତିତ ସୈଫ ଅଲ୍ଲୀ ଖାଁ, କୃତି ସାନୁନ, ସନ୍ନ ସିଂହ ଆଦି ନଜର ଆସିବେ ।
