ଭଦ୍ରକ (ଏଟିଆର ବ୍ୟୁରୋ); ଶଳା ବାହାଘରର ଶୋଭାଯାତ୍ରାରେ ଦୁଇ ଶଢ଼ୁ ଖୁସିରେ ଯାଉଥିଲେ । ତେବେ ଏହି ସମୟରେ ଏକ ବୋଲେରୋ ଆସି ଉଭୟଙ୍କୁ ଚାପିଦେଲା । ଦୁର୍ଘଟଣାରେ ଚାଲିଗଲା ଦୁଇ ଶଢ଼ୁଙ୍କ ଜୀବନ । ତେବେ ଏଭଳି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି ଭଦ୍ରକ ଜିଲ୍ଲା ତିହିଡି ଥାନା ଗୋଳପୋଖରୀ ଛକ ନିକଟରେ । ମୃତକ ହେଲେ ତିହିଡି ଥାନା ଅଧିନ ପାଳିଆବିନ୍ଧା ପଞ୍ଚାୟତ ଜିଝାରପୁର ଗ୍ରାମର ଦୀନବନ୍ଧୁ ମିଶ୍ରଙ୍କ ପୁଅ କଦମ୍ବବନ୍ଧୁ ଆର୍ୟ୍ୟଭଟ୍ଟ ମିଶ୍ର(୪୨) ଓ ଭଦ୍ରକ ନରିପୁର ଅସ୍ଥଳ ଗାଁର ନରେଶ ଦାସଙ୍କ ପୁଅ ରମେଶ ଦାସ(୩୮)। ପୋଲିସକୁ ଖବର ପାଇବା ପରେ ବୋଲେରୋ ଡାଇଭରଙ୍କୁ ଗିରଫ କରିବା ସହିତ ଗାଡିକୁ ଜବତ ରଖିଛି ।
ସୂଚନା ଅନୁଯାୟୀ ଗତକାଲି ଶଳା ବାହାଘର ଶୋଭାଯାତ୍ରାରେ ଯାଉଥିବା ବେଳେ ହଠାତ ଗୋଳପୋଖରୀ ଛକ ନିକଟର ବିପରୀତ ଦିଗରୁ ବୋଲେରୋଟି ଆସି ଉଭୟଙ୍କ ଉପରେ ଚଢ଼ିଯାଇଥିଲା । ଘଟଣାସ୍ଥଳରେ ରମେଶଙ୍କ ମୃତ୍ୟୁ ହୋଇଥିବା ବେଳେ ଭଦ୍ରକ ମେଡିକାଲରେ କଦମ୍ବବନ୍ଧୁଙ୍କ ମୃତ୍ୟୁ ହୋଇଛି । ରମେଶଙ୍କ ପୁତୁରା ଏହି ଦୁର୍ଘଟଣା ପରେ ଥାନାରେ ଏତଲା ଦେଇଥିଲେ । ଅଭିଯୁକ୍ତ ଡ୍ରାଇଭର କିଶୋର ପାଢ଼ୀଙ୍କୁ ଗିରଫ କରିଛି ପୋଲିସ । ପରେ ଉଭୟଙ୍କ ଶବକୁ ବ୍ୟବଛେଦ ପାଇଁ ପଠାଯାଇଥିଲା । ତେବେ ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ସ୍ଥାନୀୟ ଲୋକ ଭଦ୍ରକ-ଚାନ୍ଦବାଲି ମୁଖ୍ୟ ରାସ୍ତା ଅବରୋଧ କରିଥିଲେ । ପରେ ପୋଲିସ ପ୍ରଶାସନ ପ୍ରତିଶୃତି ଦେବା ପରେ ରାସ୍ତାରୁ ହଟିଥିଲେ ଉତ୍ୟକ୍ତ ଲୋକ ।
