ଭୁବନେଶ୍ୱର,(ଏଟିଆରବ୍ୟୁରୋ): ପୁଣି ଏକ ଦୁର୍ଘଟଣା । ବରମୁଣ୍ଡା ଓଭରବ୍ରିଜ ଉପରେ ଏକ କାର ମଙ୍ଗଳବାର ରାତିରେ ଦୁର୍ଘଟଣାଗସ୍ତ ଘଟିଛି । ଯଦିଓ ଘଟଣାରେ ସେମିତି କିଛି ବଡ଼ ଧରଣର ଅଘଟଣ ଘଟିନାହିଁ ତଥାପି ଘଟଣାରେ ଜଣେ ମହିଳା ଗୁରୁତର ଆହତ ହୋଇଥିବା ସୂଚନା ମିଳିଛି । ସେପଟେ ଦୁର୍ଘଟଣାରେ କାରଟି ସମ୍ପୂର୍ଣ୍ଣ ଚୁରମାର ହୋଇଯାଇଛି ।
ବିଳମ୍ବିତ ରାତିରେ ଘଟିଥିବା ଏହି ଦୁର୍ଘଟଣା ଯୋଗୁ ବେଶ କିଛି ସମୟ ରାସ୍ତାରେ ଗାଡି ଚଳାଚଳ ବାଧାପ୍ରାପ୍ତ ହୋଇଥିଲା । ପରେ ପୁଲିସ ପହଞ୍ଚି ଭିଡ଼ ହଟାଇବା ପରେ ଯାତାୟତ ସ୍ୱାଭାବିକ ହୋଇଥିଲା । ମିଳିଥିବା ରିପୋର୍ଟ ଅନୁସାରେ, ବରମୁଣ୍ଡାରୁ ଗାଡିଟି ରସୁଲଗଡ଼ ଅଭିମୁଖେ ଆସୁଥିବା ବେଳେ ଏହି ଦୁର୍ଘଟଣା ଘଟିଥିବା କୁହାଯାଉଛି । ଭାରସାମ୍ୟ ହରାଇ ଗାଡିଟି ପ୍ରଥମେ ଓଭରବ୍ରିଜ୍ ଉପରେ ଥିବା ଡିଭାଇଡରରେ ପିଟି ହୋଇଯାଇଥିଲା ।
ଗାଡିର ବେଗ ଅଧିକ ଥିବା ଯୋଗୁ କାରଟି ସିଧା ପଲଟି ମାରିଥିଲା । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି କାରକୁ ଜବତ କରିବା ସହ ଦୁର୍ଘଟଣାରେ ଆହତ ମହିଳାଙ୍କୁ ଚିକିତ୍ସା ଲାଗି ହସପିଟାଲ ପଠାଇଛି ।
