ଢ଼େଙ୍କାନାଳ,(ଏଟିଆରବ୍ୟୁରୋ): ରାସ୍ତା ସମ୍ପ୍ରସାରଣ ପାଇଁ ନିୟୋଜିତ ଗ୍ରେଡର ଧକ୍କାରେ ଜଣଙ୍କର ମୃତ୍ୟୁ ହେବା ସହ ଘଟଣାରେ ୪ଜଣ ଗୁରୁତର ଆହତ ହୋଇଛନ୍ତି । ମୃତବ୍ୟକ୍ତି ନଡିଆଳି ଗାଁର ଭରତ ବେହେରା । ଘଟଣା ଘଟିଛି ଢ଼େଙ୍କାନାଳ ଜିଲ୍ଲା ବଳଦିଆ ବନ୍ଧ ନିକଟରେ । ତେବେ ଏହି ଘଟଣାକୁ ନେଇ ଆଜି ତୀବ୍ର ଉତ୍ତେଜନା ଦେଖା ଦେଇଥିଲା । ପୁଲିସ ପହଞ୍ଚି ବୁଝାସୁଝା କରିବା ପରେ ପରିସ୍ଥିତି ସ୍ୱାଭାବିକ ହୋଇଛି ।
ଗ୍ରେଡରଟି ସିରିଜ୍ ଦୁର୍ଘଟଣା ଘଟାଇଥିବା ଲୋକେ ଅଭିଯୋଗ କରିଛନ୍ତି । ରିପୋର୍ଟ ଅନୁସାରେ, ମଙ୍ଗୁଳିଠୁ ସମ୍ବଲପୁର ଯାଏଁ ରାସ୍ତା କାମ ଚାଲିଛି । ତେବେ ବଳଦିଆବନ୍ଧ ପାଖରେ ନିୟୋଜିତ ଏକ ଗ୍ରେଡର ପ୍ରଥମେ ବାଟରେ ଯାଉଥିବା ସ୍କୁଟିକୁ ଧକ୍କା ଦେଇଥିଲା । ଯେଉଁ ସ୍କୁଟିରେ ଭରତଙ୍କ ସମେତ ଅନ୍ୟ ୨ଜଣ ଥିଲେ । ତେବେ ଖାଲି ଭରତଙ୍କ ସ୍କୁଟିକୁ ନୁହେଁ ବରଂ ପରେ ଗ୍ରେଡରଟି ଏକ ବାଇକକୁ ବି ଧକ୍କା ଦେଇଥିଲା । ଦୁର୍ଘଟଣାରେ ଭରତଙ୍କ ମୃତ୍ୟୁ ହୋଇଥିବା ବେଳେ ବାକି ୪ଜଣ ଲହୁଲୁହାଣ ହୋଇଥିଲେ । ଆହତ ସମସ୍ତଙ୍କୁ ଏବେ କଟକ ବଡ଼ ମେଡିକାଲ ପଠାଇ ଦିଆଯାଇଥିବା ସୂଚନା ମିଳିଛି ।
ତେବେ ଘଟଣା ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଦେଖା ଦେଇଥିଲା ଉତ୍ତେଜନା । ସେପଟେ ସିରିଜ୍ ଦୁର୍ଘଟଣା ଘଟାଇବା ପରେ ଏବେ ଗ୍ରେଡର ଡାଇଭର ଫେରାର ରହିଛି । ସଦର ଥାନା ପୁଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ଗ୍ରେଡର ରାସ୍ତାରେ ଚାଲିବାକୁ ହେଲେ ଅନେକ ନିୟମ ରହିଛି । ସେସବୁ ନିୟମ ଠିକା ନେଇଥିବା ସଂସ୍ଥା ପାଳନ କରିଛି କି’ ନାହିଁ ସେନେଇ ପୁଲିସ ତନାଘନା ଚଳାଇଛି । ସୂଚନାଯୋଗ୍ୟ, ରାସ୍ତା କାମ ଚାଲିବା ଯୋଗୁଁ ଏବେ ସ୍ଥାନୀୟ ଅଞ୍ଚଳରେ ହରଦମ ଛୋଟମୋଟ ଦୁର୍ଘଟଣା ଘଟୁଛି ।
