ଭୁବନେଶ୍ୱର,(ଏଟିଆରବ୍ୟୁରୋ): ହୁତୁହୁତୁ ହୋଇ ଜଳିଲା ବସ । ବରମୁଣ୍ଡା ବସ ଷ୍ଟାଣ୍ଡରେ ଠିଆ ହୋଇଥିବା ବେଳେ ବୁଧବାର ଚକାଡୋଳା ବସରେ ଅଚାନକ୍ ନିଆଁ ଲାଗି ଯାଇଛି । ଯଦିଓ ନିଆଁ ଲାଗିବାର ପ୍ରକୃତ କାରଣ କ’ଣ ଜଣାପଡିନାହିଁ ତଥାପି ଘଟଣାକୁ ନେଇ ପୂରା ବସ ଷ୍ଟାଣ୍ଡରେ ଆତଙ୍କ ଖେଳିଯାଇଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ଘଟଣାରେ କାହାରି କିଛି କ୍ଷତି ହୋଇନଥିବା ସୂଚନା ମିଳିଛି ।
ଖବର ପାଇ ଅଗ୍ନିଶମ ବିଭାଗର କର୍ମଚାରୀମାନେ ପହଞ୍ଚି ନିଆଁକୁ ଆୟତ କରିବାକୁ ଚେଷ୍ଟା ଚଳାଇଛନ୍ତି । ରିପୋର୍ଟ ଅନୁସାରେ, ଦିନ ପ୍ରାୟ ୨ଟା ବେଳେ ବରମୁଣ୍ଡା ବସଷ୍ଟାଣ୍ଡରେ ଚକାଡୋଳା ନାମକ ଏହି ବସଟି ଛିଡା ହୋଇଥିଲା । ତେବେ ଅଚାନକ୍ ଗାଡିରୁ ଧୂଆଁ ବାହାରୁଥିବା ଲୋକେ ଦେଖିବାକୁ ପାଇଥିଲେ । କେହି କିଛି ବୁଝିବା ପୂର୍ବରୁ ଅଚାନକ୍ ବସଟି ଜଳିବାକୁ ଲାଗିଥିଲା । ଯଦିଓ ଲୋକେ ନିଆଁ ଲିଭାଇବାକୁ ଚେଷ୍ଟା କରିଥିଲେ କିନ୍ତୁ ତାହା ସମ୍ଭବ ହୋଇନଥିଲା । ଆଉ ଆଖି ଆଗରେ ହୁତୁହୁତୁ ହୋଇ ଜଳିଯାଇଥିଲା ବସ୍ । ପାଖରେ ଥିବା ଲୋକେ ଆତଙ୍କିତ ହୋଇପଡିଥିଲେ । କେବଳ ଲୋକେ କାହିଁକି ଅନ୍ୟ ଗାଡି କର୍ମଚାରୀମାନେ ମଧ୍ୟ ଭୟଭିତ ହୋଇପଡିଛନ୍ତି ।
