ସୁନ୍ଦରଗଡ(ଏଟିଆର ବ୍ୟୁରୋ): ଗତକାଲି ବିଲମ୍ବିତ ରାତିରେ ସୁନ୍ଦରଗଡ ଜିଲ୍ଲା ରାଜଗାଙ୍ଗପୁର ଥାନା ଅନ୍ତର୍ଗତ କୁନୁମୁରୁ ପଞ୍ଚାୟତରେ ଥିବା ଅଗ୍ରସେନ ରାଇସ ମିଲରେ ଅଗ୍ନିକାଣ୍ଡ ଘଟିଛି । ସୂଚନା ଅନୁସାରେ ଗତକାଲି ରାତି ପ୍ରାୟ ୩ଟା ବେଳେ ଅଗ୍ରସେନ ରାଇସ ମିଲରେ ନିଆଁ ଲାଗିଥିବାର ଦେଖିବାକୁ ମିଳିଥିଲା । ମିଲରେ ଗଛିତ ରଖାଯାଇଥିବା ଗାଡିର ପୁରୁଣା ଟାୟାରରେ ନିଆଁ ଲାଗିଯାଇଥିଲା । ନିଆଁର ପ୍ରଭାବ ଏତେ ଜୋରରେ ଥିଲା ଯେ ମିଲ ନିକଟରେ ଯାଇଥିବା ୧୩୨କେଭିର ବିଦ୍ୟୁତ ତାର ଛିଣ୍ଡି ଯାଇଥିଲା । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଥିଲା ।
ନିଆଁକୁ ଦେଖି ସ୍ଥାନୀୟ ଲୋକ ମାନେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ କୁତ୍ରା ଓ ରାଜଗାଙ୍ଗପୁରର ଅଗ୍ନିଶମ ବିଭାଗ ସେଠାରେ ପହଞ୍ଚି ନିଆଁକୁ ଆୟତ କରିବାରେ ଲାଗିପଡିଥିଲା । ତେବେ କିଛି ସମୟ ପରେ ଡାଲମିଆ ସିମେଣ୍ଟର ଅଗ୍ନିଶମ ବିଭାଗର ଦମକଳ ବାହିନୀ ସେଠାରେ ପହଞ୍ଚିଥିଲା । ୩ଟି ବିଭାଗର ଦମକଳ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାରେ ସଫଳ ହୋଇଛନ୍ତି । ଅଗ୍ରସେନ ରାଇସ ମିଲର ମାଲିକ ରାଜଗାଙ୍ଗପୁରର ବାସିନ୍ଦା ପ୍ରଦୀପ ଅଗ୍ରୱାଲ ବୋଲି ଜଣାପଡିଛି । ବର୍ତ୍ତମାନ ସୁଦ୍ଧା କାହାର ପ୍ରାଣ ହାନୀ ହୋଇ ନଥିବାର ସୂଚନା ରହିଛି ।
