କଳାହାଣ୍ଡି (ଏଟିଆର ବ୍ୟୁରୋ); ବୁଧବାର ରାତିରେ କଳାହାଣ୍ଡି ଜିଲ୍ଳା ଧର୍ମଗଡ ତିନିଛକ ନିକଟରେ ଘଟିଛି ଏକ ମର୍ମନ୍ତୁଦ ସଡକ ଦୁର୍ଘଟଣା । ଏହି ଦୁର୍ଘଟଣରେ ଜଣେ ଯୁବକଙ୍କ ଅକାଳରେ ମୃତ୍ୟୁ ହୋଇଥିବା ବେଳେ ଦୁଇ ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ ଧର୍ମଗଡ ମେଡିକାଲରେ ଭର୍ତ୍ତି କରାଯାଇଛି । ସେମାନଙ୍କ ଅବସ୍ଥା ସଙ୍କଟାପର୍ଣ୍ଣ ଥିବା ଡାକ୍ତର ସୂଚନା ଦେଇଛନ୍ତି । ସେପଟେ ଏହି ଦୁର୍ଘଟଣାରେ ମୃତକ ହେଲେ ଆଦିତ୍ୟ ପାତ୍ର । ତାଙ୍କ ଘର ଛତିଶଗଡରେ ବୋଲି ଜଣା ପଡିଛି । ପୋଲିସ କବର ପାଇବା ପରେ ଦୁଇ ବାଇକକୁ ଜବତ କରିବା ସହିତ ମୃତକଙ୍କୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ।
ମିଳିଥିବା ସୂଚନା ମୁତାବକ ଗତକାଲି ଆଦିତ୍ୟ କୌଣସି କାମରେ ଛତିଶଗଡରୁ ଧର୍ମଗଡ ଆସିଥିଲେ । କାମ ସରିବା ପରେ ରାତି ପ୍ରାୟ ୧୦ ବେଳେ ଛତିଶଗଡ ଫେରୁଥିବା ବେଳେ ଧର୍ମଗଡ ତିନିଛକ ନିକଟରେ ଅପରପକ୍ଷରୁ ଆସୁଥିବା ଅନ୍ୟ ଏକ ବାଇକ ସହିତ ତାଙ୍କର ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ସ୍ଥାନୀୟ ଲୋକ ଦୁର୍ଘଟଣା ଦେଖିବା ପରେ ପୋଲିସକୁ ଖବର ଦେଇଥିଲେ । ପୋଲିସ ଖବର ପାଇ ଘଟଣାସ୍ଥଳରେ ପହଁଞ୍ଚି ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଥିଲା । ସେପଟେ ଆହତଙ୍କୁ ମେଡିକାଲରେ ଭର୍ତ୍ତି କରିବା ସହିତ ଦୁଇ ବାଇକକୁ ଜବତ ମଧ୍ୟ କରିଛି । ତେବେ ଗୁରୁତର ଆହତଙ୍କ ଘର କଳାହାଣ୍ଡି ଜିଲ୍ଲା ଗୋଲାମୁଣ୍ଡା ଅଞ୍ଚଳରେ ବୋଲି ଜଣା ପଡିଛି ।
