ଜୟପୁର (ଏଟିଆର ବ୍ୟୁରୋ); ଘରେ ଶୋଇଥିଲା । ଦୁର୍ଭାଗ୍ୟ ବସତଃ ଘର ଉପରେ ମାଡିଗଲା ବାଲି ବୋଝେଇ ଟ୍ରକ । ଗୋଟିଏ ପରିବାରର ତିନି ଜଣଙ୍କର ଅକାଳରେ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । କୋରାପୁଟ ଜିଲ୍ଲା ସୁନାବେଡା ଥାନା ଅଞ୍ଚଳରେ ଘଟିଥିଲା ଏଭଳି ଦୁଃଖଦ ଘଟଣା । ଜଣଙ୍କ ପରିବାରର ସ୍ୱାମୀ,ସ୍ତ୍ରୀ ଏବଂ ତାଙ୍କର ୮ବର୍ଷର ଝିଅ ପ୍ରାଣ ହରାଇଛନ୍ତି ।
ମିଳିଥିବା ସୂଚନା ମୁତାବକ,ଶୁକ୍ରବାର ବିଳମ୍ବିତ ରାତିରେ ଘଟିଛି ଏଭଳି ଅଘଟଣ । ଖାଇ ସାରି ନିଘୋଡ ନିଦରେ ଶୋଇଥିଲେ ପରିବାର ଲୋକ । ତେବେ ଟ୍ରକଟି ଭାରସାମ୍ୟ ହରାଇ ଘର ଉପରେ ଚଢ଼ି ଯାଇଥିବା ଅନୁମାନ କରାଯାଉଛି । ଦୁର୍ଘଟଣା ଘଟାଇବା ପରେ ଟ୍ରକ ଡାଇଭର ଫେରାର ହୋଇ ଯାଇଛି । ପୋଲିସ ଘଟଣାସ୍ଥଳରେ ପହଁଞ୍ଚି ତଦନ୍ତ ଆରମ୍ଭ କରିଛି ।
ଦୁର୍ଘଟଣା ଘଟାଇଥିବା ଟ୍ରକଟି ମାଥନାପୁଟ ଅଞ୍ଚଳର ବୋଲି ଜଣା ପଡିଛି । ଟ୍ରକଟି ସିମିଳିଗୁଡାରୁ ଦାମନଯୋଡି ଯାଉଥିଲା । ପରିବାରର ଅଳ୍ପକେ ବର୍ତ୍ତି ଯାଇଥିବା ସଦସ୍ୟଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖା ଦେଇଛି । ଉତ୍ୟକ୍ତ ଲୋକ ଟାୟାର ଜାଳି ରାସ୍ତା ଅବରୋଧ କରିଛନ୍ତି । ପୋଲିସ ଘଟଣାସ୍ଥଳରେ ପହଁଞ୍ଚି ବୁଝା ଶୁଝା କରୁଛି । ମୃତକଙ୍କ ପରିବାରକୁ କ୍ଷତି ପୂରଣ ଦାବି କରିଛନ୍ତି ଉତ୍ୟକ୍ତ ଲୋକ ।
