ବିନିକା (ଏଟିଆର ବ୍ୟୁରୋ); କାର-ବାଇକ ମୁହାଁମୁହିଁ ଧକ୍କା । ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ରହିଛି । ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ଥାନା ଅନ୍ତର୍ଗତ ଅଙ୍ଗନଦୀ ବ୍ରିଜ ଉପରେ ଘଟିଛି ଏଭଳି ସଡକ ଦୁର୍ଘଟଣା । ମୃତକ ହେଲେ ଶୁକ୍ରୁ ସାହୁ(୫୫) ଗୁରୁତର ଆହତ ହେଲେ ଭକ୍ତ ନାୟକ(୨୨) । ଉଭୟଙ୍କ ଘର ବରଗଡ ଜିଲ୍ଲା ବରପାଲି ଅର୍ନ୍ତଗତ ବାରଙ୍ଗପାଲିରେ ବୋଲି ଜଣା ପଡିଛି ।
ସୋମବାର ସକାଳେ ଶୁକ୍ରୁ ଏବଂ ଭକ୍ତ ବଲାଙ୍ଗୀର ଅଭିମୁଖେ ଯାଉଥିଲେ । ବିପରୀତ ଦିଗରୁ ଆସୁଥିବା ଏକ କାର ତାଙ୍କୁ ସାମନାରୁ ଧକ୍କା ଦେଇଥିଲା । କାରର ବେଗ ଏତେ ଜୋର ଥିଲା କି ମାଡ ହେବା ପରେ ବାଇକ ଚାଳକଙ୍କ ଗୋଡରୁ ହାଡ ବାହାରି ପଡିଥିଲା । ସ୍ଥାନୀୟ ଲୋକ ଶୁକ୍ରୁ ଏବଂ ଭକ୍ତଙ୍କୁ ଉଦ୍ଧାର କରି ସ୍ଥାନୀୟ ଡୁଙ୍ଗୁରୁପାଲି ମେଡିକାଲରେ ଭର୍ତ୍ତି କରିଥିଲେ । ତେବେ ପରେ ଅବସ୍ଥା ସଙ୍କଟାପର୍ଣ୍ଣ ହେବାରୁ ଉଭୟଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ଶୁକ୍ରୁଙ୍କୁ ମୃତ ଘୋଷଣା କରିଥିଲେ ।
ପୋଲିସ ଖବର ପାଇବା ପରେ ମୃତ ଦେହକୁ ବ୍ୟବଛେଦ ପାଇଁ ପଠାଇ ଦେଇଛି । ଅପରପକ୍ଷରେ ଦୁର୍ଘଟଣା ଘଟିଥିବା କାର ଏବଂ ବାଇକକୁ ଜବତ କରିଛି । ଦୁର୍ଘଟଣା ଘଟିଥିବା ଅଞ୍ଚଳର ଲୋକ ପ୍ରଥମେ କାରକୁ ଅଟକାଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଁଞ୍ଚିଥିଲେ । ତେବେ ଶୁକ୍ରୁଙ୍କ ମୃତ୍ୟୁ ଖବର ପାଇ ପରିବାର ଲୋକ ମେଡିକାଲରେ ପହଁଞ୍ଚି ଯାଇଛନ୍ତି ।
