ରାୟଗଡା (ଏଟିଆର ବ୍ୟୁରୋ); ସନ୍ଦେହ ଘେରରେ ଶିକ୍ଷକଙ୍କ ମୃତ୍ୟୁ । ହତ୍ୟା,ଆତ୍ମହତ୍ୟା ନାଁ ଦୁର୍ଘଟଣା ତାହା ଜଣାପଡିନାହିଁ । ତେବେ ଏଭଳି ରହସ୍ୟ ଜନକ ଘଟଣା ଘଟିଛି ରାୟଗଡା ଜିଲ୍ଲା ମୁନିଗୁଡା ଥାନା ଅନ୍ତର୍ଗତ କୁଟ୍ରାଗଡା ଅଞ୍ଚଳରେ । ବଂଶଧାରା ନଦୀ ପୋଲତଳୁ ଶିକ୍ଷକଙ୍କ ମୃତଦେହ ଉଦ୍ଧାର ହୋଇଛି । ମୃତଦେହ ଉପରେ ବାଇକ ପଡିରହିଥିବା ଦେଖିବାକୁ ମିଳିଛି । ମୃତ ଶିକ୍ଷକ ହେଲେ ସମଦଳା ସ୍କୁଲର ରାମଚନ୍ଦ୍ର ମହନନ୍ଦିଆ । ପୋଲିସ ଖବର ପାଇବା ପରେ ମୃତଦେହ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ।
ପୋଲିସ ରିପୋର୍ଟ ମୁତାବକ ସୋମବାର ସକାଳେ ସ୍ଥାନୀୟ ଲୋକ ମୃତଦେହକୁ ଦେଖିଥିଲେ । ପ୍ରଥମେ ସେମାନେ ମୃତଦେହ ଦେଖି ଡରି ଯାଇଥିଲେ । ଶିକ୍ଷକଙ୍କ ପାଖକୁ ଯାଇ ଜୀବିତ ଅଛନ୍ତି କି ମୃତ ଅଛନ୍ତି ଜାଣିବା ପାଇଁ ଚାହିଁଥିଲେ । ତେବେ ମୃତ ବୋଲି ଜାଣିବା ପରେ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଁଞ୍ଚି ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ।
ସନ୍ଦେହ ଘେରରେ ରହିଛି ଶିକ୍ଷକଙ୍କ ମୃତ୍ୟୁ । କେହି କେହି କହୁଛନ୍ତି ଗତକାଲି ରାତିରେ ଦୁର୍ବୃତମାନେ ତାଙ୍କୁ ମାରିବା ପରେ ପୋଲତଳକୁ ଫୋପାଡି ଚାଲିଯାଇଛନ୍ତି । ତେବେ ମୃତଦେହ ଉପରେ ଗାଡି ପଡିଥିବାରୁ ଏହାକୁ କେହି କେହି ଦୁର୍ଘଟଣାର ରୂପ ଦେଉଛନ୍ତି । ତେବେ ସେ ଯାହା ବି ହେଉ ବ୍ୟବଛେଦ ରିପୋର୍ଟ ଆସିବା ପରେ ସବୁକିଛି ଜଣା ପଡିଯିବ ବୋଲି ପୋଲିସ ସୂଚନା ଦେଇଛି । ପରିବାର ଲୋକ ଏହି ଖବର ପାଇବା ପରେ ଦଃୁଖରେ ଭାଙ୍ଗି ପଡିଛନ୍ତି ।
