ନୂଆଦିଲ୍ଲୀ (ଏଟିଆର ବ୍ୟୁରୋ): କନ୍ନଡ ସୁପରଷ୍ଟାର ପୁନିତ ରାଜକୁମାରଙ୍କର ଗତକାଲି ଅଚାନକ ମୃତ୍ୟୁ ଘଟିଛି । ହୃଦଘାତରେ ତାଙ୍କର ମୃତ୍ୟୁ ହୋଇଛି । ତାଙ୍କର ଅଚାନକ ମୃତ୍ୟୁ ସମସ୍ତଙ୍କୁ ଝଟକା ଦେଇଛି । ସବୁଠାରୁ ବଡ କଥା ହେଉଛି ଅଭିନେତା ପୁନିତ ତାଙ୍କ ଚକ୍ଷୁ ଦାନ କରିଦେଇଛନ୍ତି ।
ପିତାଙ୍କ ଭଳି ପୁନିତ ମଧ୍ୟ ଚକ୍ଷୁ ଦାନ କରିଛନ୍ତି । ପୁନିତଙ୍କ ପିତା ଡ, ରାଜକୁମାର ୧୯୯୪ ମସିହାରେ ପୁରା ପରିବାରର ଚକ୍ଷୁ ଦାନ କରିବାର ନିଷ୍ପତି ନେଇଥିଲେ । ୨୦୦୬ ମସିହାରେ ପୁନିତଙ୍କ ପିତାଙ୍କର ମଧ୍ୟ ହୃଦଘାତରେ ମୃତ୍ୟୁ ହୋଇଥିଲା । ପୁନିତ ଚକ୍ଷୁଦାନ କରିବା ନେଇ ଅଭିନେତା ଚେତନ କୁମାର ଟ୍ୱିଟ କରି କହିଛନ୍ତି ।
ପୁନିତ କେବଳ ଜଣେ ଅଭିନେତା ନଥିଲେ ବରଂ ଜଣେ କଣ୍ଠଶିଳ୍ପୀ ମଧ୍ୟ ଥିଲେ । ୧୯୭୫ ମସିହା ମାର୍ଚ୍ଚ ୧୭ ରେ ସେ ଜନ୍ମ ଗ୍ରହଣ କରିଥିଲେ । ସେହିପରି ୨୦୦୨ ମସିହାରେ ଫିଲ୍ମ ଅପ୍ପୁ ଜରିଆରେ ନିଜର ଫିଲ୍ମ କ୍ୟାରିଅର ଆରମ୍ଭ କରିଥିଲେ ।
