ମୁମ୍ବାଇ (ଏଟିଆର ବ୍ୟୁରୋ): ସଫଳତାର ଗୋଟେ ପରେ ଗୋଟେ ପାହାଚ ଚଢିଚାଲିଛନ୍ତି ବଲିଉଡ ଅଭିନେତ୍ରୀ ପ୍ରିୟଙ୍କା ଚୋପ୍ରା । ପ୍ରଥମ ବଲିଉଡ, ତାପରେ ହଲିଉଡରେ ଖ୍ୟାତି ଅର୍ଜନ କରିବା ପରେ ଏବେ ପୁଣି ପ୍ରିୟଙ୍କା ନାଁ ଆଉ ଏକ ନୂତନ ତାଲିକାରେ ସାମିଲ ହେବାକୁ ଯାଉଛି । ଆଜ୍ଞା ହଁ ୟୁଏସ ଟୁଡେର ପାୱାର ଆଇକନ୍ ଲିଷ୍ଟରେ ସାମିଲ ହୋଇଛି ପ୍ରିୟଙ୍କାଙ୍କ ନାଁ । ଏହି ଲିଷ୍ଟ ଅନୁସାରେ ମନୋରଞ୍ଜନ ଜଗତର ୫୦ ଜଣ ପାୱରଫୁଲ ମହିଳା ତାଲିକାରେ ପ୍ରିୟଙ୍କା ଅଛନ୍ତି ।
ଏହି ତାଲିକାରେ ପ୍ରିୟଙ୍କା ଚୋପ୍ରାଙ୍କ ବ୍ୟତିତ ଓପରା ବିନଫ୍ରେ,ବିୟାଂସେ, ଏଲନ ଡି ଜେନେରସ ଏବଂ ନିକୋଲ କିଡମନଙ୍କ ନାଁ ବି ସାମିଲ ଅଛି । ୫୦ ଶକ୍ତିଶାଳୀ ତାଲିକାରେ ନାଁ ଯୋଡୀ ହେବା ପରେ ପ୍ରିୟଙ୍କା ଏକ ସାକ୍ଷାତକାରରେ ତାଙ୍କ ହୃଦୟର କଥା କହିଛନ୍ତି । ସେ କହିଛନ୍ତି କି, ‘ଶକ୍ତି ହେଉଛି ଏନର୍ଜି, ଆପଣ ଯାହା କରିବାକୁ ଚାହିଁବେ ତାକୁ କରିବା ପାଇଁ ସେ ଶକ୍ତି ଯୋଗାଇ ଥାଏ ।’
ସେ ଆହୁରୀ ମଧ୍ୟ କହିଛନ୍ତି କି ଏହି ତାଲିକାରେ ମୋ ସହିତ ଆହୁରୀ ଅନେକ ମହିଳା ଅଛନ୍ତି ଯେଉଁମାନେ ଚ୍ୟାଲେଞ୍ଜକୁ ସାମ୍ନା କରିଛନ୍ତି ଏବଂ ଆଜି ନିଜ କ୍ୟାରିୟରରେ ସଫଳ ହୋଇପାରିଛନ୍ତି ।
ଏହାପୂର୍ବରୁ ଫୋବର୍ସ ଇଣ୍ଡିଆ ୨୦୧୮ର ସବୁଠାରୁ ଧନୀ ସେଲିବ୍ରିଟି ତାଲିକାରେ ପ୍ରିୟଙ୍କାଙ୍କ ନାଁ ଯୋଡି ହୋଇସାରିଛି । ରିପୋର୍ଟ ମୁତାବକ ନିକଟରେ ପ୍ରିୟଙ୍କା ଚୋପ୍ରା ‘ଦି ସ୍କାଇ ଇଜ୍ ପିଙ୍କ୍’ ଫିଲ୍ମର ସୁଟିଂ ସେଡ୍ୟୁଲକୁ ଶେଷ କରି ବିଦେଶ ଫେରି ଯାଇଛନ୍ତି ।
ପ୍ରିୟଙ୍କା ଆଗାମୀ ଫିଲ୍ମ ‘ଦି ସ୍କାଇ ଇଜ୍ ପିଙ୍କ’ ମହିଳାଙ୍କ ଉପରେ ଆଧାରିତ ହୋଇଛି । ହାରାହାରି ୩ ବର୍ଷ ପରେ ପ୍ରିୟଙ୍କା ଏହି ଫିଲ୍ମ ଜରିଆରେ ବଲିଉଡକୁ ଫେରିଛନ୍ତି । ଏଥିରେ ପ୍ରିୟଙ୍କାଙ୍କ ବ୍ୟତିତ ଜାୟାରା ୱାସିମ ଏବଂ ଫରହାନ୍ ଅଖତର ମୁଖ୍ୟ ଭୂମିକାରେ ନଜର ଆସିବେ ।
