ଭୁବନେଶ୍ୱର (ଏଟିଆର ବ୍ୟୁରୋ): ବଲିଉଡ ଫିଲ୍ମ ‘ଲଭ ୟୁ ଟର୍ଣ୍ଣ’ର ଦୁଇଟି ଗୀତ ପାଇଁ ମ୍ୟୁଜିକ ଦେଇଛନ୍ତ ଓଲିଉଡର ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ପ୍ରେମ ଆନନ୍ଦ । ଏହି ଦୁଇଟି ଯାକ ଗୀତକୁ କଣ୍ଠଶିଳ୍ପୀ ମୋହିତ ଚୌହାନ ଓ ଜୁବିନ ନଉଟିୟାଲ ଗାଇଛନ୍ତି । ‘ବାହୋ ମେଁ’ ନାମକ ଗୀତଟିକୁ ମୋହିତ ଚୌହାନ ଗାଇଥିବା ବେଳେ ‘ଖୁଦା ରାଜି’ ଗୀତକୁ ଜୁବିନ ଗାଇଛନ୍ତି । ତେବେ ପ୍ରଥମେ ଜୁବିନ ଏହି ଗୀତଟିକୁ ଗାଇବାକୁ ମନା କରିଦେଇଥିବା ପ୍ରେମ ଆନନ୍ଦ କହିଛନ୍ତି ।
ସେ ଆହୁରୀ ମଧ୍ୟ କହିଛନ୍ତି ପ୍ରଥମେ ଜୁବିନ ସଫାସଫା ଗୀତ ଗାଇବାକୁ ମନା କରିଦେଇଥିଲେ । କିନ୍ତୁ ପରେ ସେ ଗୀତ ଗାଇବାକୁ ରାଜି ହୋଇଯାଇଥିଲେ । ପ୍ରେମ ଆନନ୍ଦ ଜୁବିନଙ୍କୁ ଆଖି ଆଗରେ ରଖି ‘ଖୁଦା ରାଜି’ ଗୀତଟିକୁ କମ୍ପୋଜ କରିଥିଲେ । ଗୀତଟି ପ୍ରସ୍ତୁତ ହେବା ପରେ ଜୁବିନଙ୍କ ସହ କଥାବର୍ତ୍ତା କରାଯାଇଥିଲା । କିନ୍ତୁ ଜୁବିନ ନୂଆ ସଙ୍ଗୀତ ନିର୍ଦ୍ଦେଶକଙ୍କ ଗୀତ ଗାଉ ନଥିବା କଥା କହି ଗୀତ ଗାଇବାକୁ ସଫାସଫା ମନା କରିଦେଇଥିଲେ । ହେଲେ ପ୍ରେମ ଆନନ୍ଦ ତାଙ୍କୁ ଥରେ କମ୍ପୋଜିସନ ଶୁଣିବାକୁ ଅନୁରୋଧ କରିଥିଲେ ।
ତାଙ୍କ ଅନୁରୋଧକୁ ରକ୍ଷା କରି ଜୁବିନ କମ୍ପୋଜିସନ ଗୀତଟିକୁ ଶୁଣିଥିଲେ । ଏହା ପରେ ତାଙ୍କୁୁ ଏହା ଖୁବ ପସନ୍ଦ ଆସିଥିଲା । ଏହା ପରେ ସେ ପ୍ରେମ ଆନନ୍ଦଙ୍କୁ ଫୋନ କରି ଗୀତ ରେକର୍ଡିଂ କରିବେ ବୋଲି କହିଥିଲେ । ଖାଲି ସେତିକି ନୁହେଁ ତାଙ୍କୁ ଏହି ଗୀତଟି ଏତେ ପସନ୍ଦ ଆସିଥିଲା ଯେ ଯେ ଗୀତ ପାଇଁ ଯାହା ପାରିଶ୍ରମିକ ପାଇଥିଲେ ତାହାକୁ ଅଧା କରିଦେଇଥିଲେ । ଏହା ଜାଣିବା ପରେ ପ୍ରେମ ଆନନ୍ଦ ଖୁସି ହୋଇଯିବା ସହ ନିଜକୁ ଗର୍ବ ଅନୁଭବ କରିଥିଲେ ।
