ଭୁବନେଶ୍ୱର,(ବ୍ୟୁରୋ): ଶ୍ରୀଦେବୀ ଯେ ଚାଲି ଯାଇଛନ୍ତି ଏକଥା ଏବେ ବି ଅନେକ ବିଶ୍ୱାସ କରିପାରୁ ନାହାନ୍ତି । ଏହି ପ୍ରଥମ ମହିଳା ସୁପରଷ୍ଟାର ଜଣକ ପୁତୁରା ମୋହିତ ମାରୱା ଓ ଅନ୍ତ୍ରା ମୋଟିୱାଲାଙ୍କ ବାହାଘରରେ ଯୋଗା ଦେବା ପାଇଁ ସପରିବାରେ ଦୁବାଇ ଯାଇଥିଲେ । ଯେଉଁଠାରେ ହିଁ ତାଙ୍କର ମୃତ୍ୟୁ ହୋଇଛି । ତେବେ ଏହି ବାହାଘରରେ ଶ୍ରୀଦେବୀ ତାଙ୍କ ଦିଅର ତଥା ଅଭିନେତା ଅନୀଲ କପୁରଙ୍କ ସହ ଶେଷଥର ପାଇଁ ନାଚିଥିବା ଭିଡିଓ ଏବେ ଭାଇରାଲ୍ ହୋଇଛି ।
ଶ୍ରୀଦେବୀ ଓ ଅନୀଲ କପୁରଙ୍କୁ ଦର୍ଶକେ ୧୯୮୭ରେ ରିଲିଜ୍ ହୋଇଥିବା ମିଷ୍ଟର୍ ଇଣ୍ଡିଆରେ ଦେଖିଥିଲେ । ଏବେ ସେହି ଯୋଡ଼ି ପୁଣିଥରେ ମୋହିତଙ୍କ ବାହାଘରରେ ନାଚୁଥିବା ଦେଖିବାକୁ ମିଳିଥିଲା । ଚିଟିୟାଁ କଲାୟାଁ ଗୀତରେ ଉଭୟ ଶ୍ରୀଦେବୀ ଓ ଅନୀଲ ଠୁମୁକା ଲଗାଇଥିଲେ । ଏବେ ସେହି ଭିଡିଓ ଭାଇରାଲ୍ ହୋଇଛି । ମୃତ୍ୟୁ ପୂର୍ବରୁ ଶ୍ରୀଙ୍କର ଏହା ଥିଲା ଶେଷ ନାଚ ।
ଏହାପୂର୍ବରୁ ଶ୍ରୀଦେବୀ ‘କାଲା ଚଷମା’ରେ ସ୍ୱାମୀ ବୋନି କପୁରଙ୍କ ସହ ନାଚି ଥିଲେ । ଜୀବନସାରା ତାଙ୍କ ଅଭିନୀତ ସିନେମାର ଗୀତ କୋଟିକୋଟି ସିନେପ୍ରେମୀଙ୍କୁ ନଚାଇଥିଲା । ବାହାଘର ଦିନ ଆଲୋକର ସାଜସଜ୍ଜା ସେମିତି ଥିଲି ଯେମିତି କିଛି ବର୍ଷ ପୂର୍ବରୁ ‘ହୱା ହୱାଇ’ ଗୀତରେ ଥିଲା । ଅବଶ୍ୟ ଆଖିରେ କଳା ଚଷମା ନଥିଲା । କିନ୍ତୁ ନୀଳ ଏବଂ ସୁନେଲି ରଙ୍ଗର ଲେହେଙ୍ଗା ପରିହିତା ଶ୍ରୀଦେବୀ ସ୍ୱାମୀ ବୋନି କପୁରଙ୍କ ସହିତ ଏହି ଗୀତର ତାଳେ ତାଳେ ନୃତ୍ୟକୁ ଖୁବ୍ ଉପଭୋଗ କରୁଥିଲେ ।
