ନୂଆଦିଲ୍ଲୀ(ଏଟିଆର ବ୍ୟୁରୋ): ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ଫଙ୍କ ଭାରତ ଗସ୍ତ କୁ ନେଇ ଚାରିଆଡେ ଚର୍ଚ୍ଚା ଜୋର ଧରିବାରେ ଲାଗିଛି । ଗୋଟିଏ ଦିନ ତଳେ ଟ୍ରମ୍ଫ ନିଜ ଭାରତ ଗସ୍ତ ସମୟରେ ତାଙ୍କୁ ୧କୋଟି ଲୋକ ସ୍ୱାଗତ କରିବେ ବୋଲି ଟ୍ୱିଟ କରିଥିଲେ ।
ଏହାପରେ ଟ୍ରମ୍ଫଙ୍କ ଏହି ଟ୍ୱିଟ୍ ସୋସିଆଲ ମିଡିଆରେ ଭାଇରାଲ ହେବାକୁ ଲାଗିଛି । ବିରୋଧି ଦଳମାନେ ଏହାକୁ ନେଇ ସମାଲୋଚନା ମଧ୍ୟ କରୁଛନ୍ତି । ତେବେ ଏହି ସ୍ରୋତରେ କଂଗ୍ରେସ ମଧ୍ୟ ସାମିଲ ହୋଇ ଟ୍ରମ୍ଫଙ୍କ ଟ୍ୱିଟ୍ କୁ ସମାଲୋଚନା କରି, ସୋସିଆଲ ମିଡିଆରେ କଂଗ୍ରେସ ତରଫରୁ ଏକ ମଜାଦାର ନିଯୁକ୍ତି ପତ୍ର ଜାରି କରାଯାଇଛି ।
ଆଜି ଟ୍ୱିଟରରେ କଂଗ୍ରେସ ପକ୍ଷରୁ ଏହି ମଜାଦାର ନିଯୁକ୍ତିର ଘୋଷଣା କରାଯାଇଛି । ତେବେ ଏଥିରେ ଜବ ଡେସ୍କ୍ରିପସନ ରହିଛି, ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ଫ ଅହମଦାବାଦ ଗସ୍ତ ଯିବା ସମୟରେ ରାସ୍ତାରେ ଛିଡା ହୋଇ ତାଙ୍କ ଆଡକୁ ହାତ ହଲାଇବା ଅଛି । ଏଥି ସହିତ ଏହି ପୋଷ୍ଟରେ ପୋଷ୍ଟ ଭ୍ୟାକେନ୍ସି ୬୯ଲକ୍ଷ ଥିବା ଲେଖା ହୋଇଥିବା ବେଳେ ଦରମା ବାବଦରେ ‘ଅଛେ ଦିନ୍’ ଆସିବ ବୋଲି ଲେଖାହୋଇଛି । ଆଉ ସବୁଠାରୁ ମଜାଦାର କଥା ହେଲା ଏଥିରେ ଜବ୍ ଲୋକେସନ ରାଷ୍ଟ୍ରପତିଙ୍କ ରୋଡ ଶୋ ଏବଂ ମୋଟେରି ଷ୍ଟାଡିୟମ ରଖାଯାଇଛି ।
