ନୂଆଦିଲ୍ଲୀ (ଏଟିଆର ବ୍ୟୁରୋ): ଜର୍ମାନୀର ହନାଉ ସହରରେ ଦୁଇଟି ସ୍ଥାନରେ ବୁଧବାର ଗୁଳିକାଣ୍ଡ ଘଟିଛି । ଏଥିରେ ୮ ଜଣଙ୍କର ମୃତ୍ୟୁ ହୋଇଥିବା ବେଳେ ୫ ଜଣଙ୍କର ଅବସ୍ଥା ସଙ୍କଟାପର୍ଣ୍ଣ ରହିଛି । ଏନେଇ ସ୍ଥାନୀୟ ଗଣମାଧ୍ୟରୁ ସୂଚନା ମିଳିଛି । ଆକ୍ରମଣକାରୀମାନେ ହନାଉ ଏବଂ ସ୍ପୁଟିନିକର ଶିଶା ବାର୍ ରେ ଅତର୍କିତ ଭାବେ ଗୁଳିବର୍ଷା କରିଛନ୍ତି । ପ୍ରଥମ ଗୁଳିକାଣ୍ଡରେ ୩ ଜଣଙ୍କର ମୃତ୍ୟୁ ହୋଇଥିବା ବେଳେ ଦ୍ୱିତୀୟ ଗୁଳିକାଣ୍ଡ ୫ ଜଣଙ୍କର ମୃତ୍ୟୁ ହୋଇଛି । ଘଟଣା ପଛରେ ଏପର୍ଯ୍ୟନ୍ତ କୌଣସି କାରଣ ସ୍ପଷ୍ଟ ହୋଇ ନାହିଁ କି ଆକ୍ରମଣକାରୀ ଧରାପଡି ନାହିଁ ।
ଏନେଇ ପୋଲିସର କହିବାନୁଯାୟୀ, ବିଳମ୍ବିତ ରାତିରେ ଶିଶା ବାରରେ ଆକ୍ରମଣକାରୀମାନେ ଆସି ୮ ରୁ ୯ ଗୁଳି ଫୁଟାଇଥିଲେ । ଏହାପରେ ସେଠାରେ ସେମାନେ ଖସି ପଳାଇଥିଲେ । ସେହି ସମୟରେ ବାରରେ ଲୋକେ ଖାଉଥିଲେ । ଏହାପରେ ପୁଣି ଆକ୍ରମଣକାରୀମାନେ ଅରେନା ବାରରରେ ଗୁଳିକାଣ୍ଡ କରିଥିଲେ । ଦୁଇଟି ସ୍ଥାନରେ ହୋଇଥିବା ଏହି ଗୁଳିକାଣ୍ଡରେ ପ୍ରକୃତରେ କେତେ ଜଣଙ୍କର ମୃତ୍ୟୁ ହୋଇଛି ତାହା ସଠିକ୍ ଭାବେ ଜଣାପଡି ନାହିଁ । ଏନେଇ ଏବେ ତଦନ୍ତ ଚାଲିଛି ।
