ନୂଆଦିଲ୍ଲୀ(ଏଟିଆର ବ୍ୟୁରୋ): ଉତ୍ତର ପ୍ରଦେଶ ଓ ବିହାରରେ ହୋଇଥିବା ବଜ୍ରପାତରେ ୨୮ ଜଣ ଲୋକଙ୍କର ମୃତ୍ୟୁ ଘଟିଛି । ଦେଶର ବିଭିନ୍ନ ସ୍ଥାନରେ ଗତକାଲି ବର୍ଷା ସହିତ ବଜ୍ରପାତ ହୋଇଥିଲା । ଉତ୍ତର ଭାରତରେ ଏହାର ପ୍ରଭାବ ଅଧିକ ରହିଥିବାର ଜଣା ପଡିଛି । ଭାରତୀୟ ପାଣିପାଗ ବିଭାଗ ସୂଚନା ଅନୁସାରେ ଆଗାମୀ ୩ରୁ ୪ ଦିନ ମଧ୍ୟରେ ଦେଶରେ ଆହୁରି ଅଧିକ ବର୍ଷା ହୋଇପାରେ । ତେଣୁ ସର୍ବାଧିକ ଓ ସର୍ବନିମ୍ନ ତାପମାତ୍ରାରେ କୌଣସି ପରିବର୍ତ୍ତନ ଦେଖାଯିବ ନାହିଁ । ରାଜଧାନୀ ଦିଲ୍ଲୀରେ ବର୍ଷା କମ ହୋଇଥିବାରୁ ଆଗାମୀ ଦୁଇ ଦିନରେ ତାପମାତ୍ରାରେ କୌଣସି ପରିବର୍ତ୍ତନ ହେବାର ସମ୍ଭାବନା ନାହିଁ ।
ତେବେ ଅତ୍ୟଧିକ ବର୍ଷା ଓ ଘଡଘଡି ପାଇଁ ବିହାରର ୬ଟି ଜିଲ୍ଲାରେ ବଜ୍ରପାତ ହୋଇଛି, ମଙ୍ଗଳବାର ୧୫ ଜଣ ଲୋକଙ୍କର ମୃତ୍ୟୁ ଘଟିଛି । ଗୋପାଳଗଂଜ, ଭୋଜପୁର ଓ ରୋହତାସରେ ୩ ଜଣ , ସାରଣ, କୈମୁର ଓ ବୈଶାଳୀ ଜିଲ୍ଲାରେ ୨ ଜଣ ଲେଖାଏଁ ଲୋକଙ୍କର ମୃତ୍ୟୁ ହୋଇଛି । ମୁଖ୍ୟମନ୍ତ୍ରୀ ନିତିଶ କୁମାର ବଜ୍ରପାତରେ ମୃତ୍ୟୁ ଘଟିଥିବା ୧୫ ଜଣଙ୍କ ପରିବାରକୁ ସମବେଦନା ଜଣାଇଛନ୍ତି । ସେ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଲୋଖାଏଁ ଅନୁକମ୍ପା ରାଶି ପ୍ରଦାନ କରିବାକୁ ଘୋଷଣା କରିଛନ୍ତି । ଉତ୍ତର ପ୍ରଦେଶରେ ବଜ୍ରପାତ ଯୋଗୁଁ ୧୩ ଜଣଙ୍କର ମୃତ୍ୟୁ ଘଟିଛି । ତେବେ ବଜ୍ରପାତ ଯୋଗୁଁ ଅନେକ ଲୋକ ଆହତ ହୋଇ ହସ୍ପିଟାଲରେ ମଧ୍ୟ ଭର୍ତ୍ତି ହୋଇଛନ୍ତି । କିଛି ଲୋକଙ୍କ ସ୍ୱାସ୍ଥ୍ୟରେ ସୁଧାର ଆସିଥିବା ବେଳେ ଅନ୍ୟ ଲୋକଙ୍କ ସ୍ୱାସ୍ଥ୍ୟରେ କୌଣସି ପରିବର୍ତ୍ତନ ଆସିନି ।
