ଭୁବନେଶ୍ୱର,(ଏଟିଆର ବ୍ୟୁରୋ): ସାମାନ୍ୟ ସନ୍ଦେହ କେତେ ଯେ ଭୟଙ୍କର ରୂପ ନେଇପାରେ ତାହାର ଆଉ ଏକ ନଗ୍ନ ଘଟଣା ସାମ୍ନାକୁ ଆସିଛି । ସ୍ୱାମୀର ଆବଭାବକୁ ସନ୍ଦେହ କରି ହତ୍ୟାକାରୀ ସାଜିଲା ସ୍ତ୍ରୀ । ସୁପାରି ଦେଇ ହତ୍ୟା କଲା ସ୍ୱାମୀକୁ । ଏଭଳି ଏକ ଅଭାବନୀୟ ଘଟଣା ଘଟିଛି ନୂଆଦିଲ୍ଲୀରେ । ପୁଲିସ ଏବେ ହତ୍ୟାକାରୀ ସ୍ତ୍ରୀ ଓ ତାଙ୍କ ଭାଇଙ୍କ ସମେତ ଆଉ ୫ଜଣଙ୍କୁ ଗିରଫ କରିଛି । ରିପୋର୍ଟ ଅନୁସାରେ, ରବିବାର ଗୁରୁଗ୍ରାମର ଏକ ଖାଲ ଭିତରୁ ଅଖା ଭିତରେ ବନ୍ଧାଯାଇଥିବା ଏକ ମୃତଦେହ ଠାବ ହୋଇଥିଲା । ପାରିପାଶ୍ୱର୍ିକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି ପୁଲିସ ସ୍ପଷ୍ଟ ହୋଇଥିଲା । ତଦନ୍ତରେ ମୃତ ବ୍ୟକ୍ତି ଯୋଗେଶ ସିଂହ(୩୭)ବୋଲି ଜାଣିବାକୁ ପାଇଥିଲା । ଯୋଗେଶଙ୍କ ଶରୀରରେ ଅନେକ୍ଷ କ୍ଷତ ଚିହ୍ନ ରହିଥିଲା । ପ୍ରାଥମିକ ତଦନ୍ତରେ ପୁଲିସ ଯୋଗେଶଙ୍କ ପତ୍ନୀ ସୁଇଟିକୁ ସ୍କାନରକୁ ଆଣିଥିଲା । ମାରାଥନ ଜେରା କରିବା ପରେ ହଡବଡେଇ ଯାଇଥିଲା ସୁଇଟି । ପାଟି ଥତମତ ହୋଇଥିଲା । ସୁଇଟି ମିଛ କହୁଥିବା ଜାଣିବା ପରେ ପୁଲିସ ଗୁଡାଇ ତୁଡାଇ ଯୋଗେଶଙ୍କ ବାବଦରେ ପ୍ରଶ୍ନ କରିବା ପରେ ଶେଷରେ ମୁହଁ ଖୋଲିଥିଲା ସୁଇଟି । ପୁଲିସକୁ ସୁଇଟି ଦେଇଥିବା ତଥ୍ୟ ଅନୁସାରେ, ଯୋଗେଶ ଓ ସୁଇଟି ଉଭୟ ଗୁରୁଗ୍ରାମରେ ରହୁଥିଲେ । ତେବେ ସେଠାରେ ଯୋଗେଶ ଆଉ କାହା ସହ ସମ୍ପର୍କ ରଖୁଥିବା ସୁଇଟି ସନ୍ଦେହ କରୁଥିଲେ । ସନ୍ଦେହ ଏତେ ବଢ଼ିଯାଇଥିଲା ଯେ, ଯୋଗେଶଙ୍କୁ ବାଟରୁ ହଟାଇବା ଲାଗି ନିଜ ଭାଇ ସହ ମିଶି ଷଡଯନ୍ତ୍ର କରିଥିଲେ ସୁଇଟି । ପରେ ଭଡାଟିଆ ଗୁଣ୍ଡା ଲଗାଇ ୧୬ଲକ୍ଷ ଟଙ୍କା ଦେଇ ସେ ଯୋଗେଶଙ୍କୁ ହତ୍ୟା କରିଥିବା ନିଜେ ସ୍ୱୀକାର କରିଛି ।
