ମୁମ୍ବାଇ (ଏଟିଆର ବ୍ୟୁରୋ): ଭାରତୀୟ କ୍ରିକେଟ ଜଗତର ସବୁଠାରୁ ଚର୍ଚ୍ଚିତ ଚେହେରା ଭାବେ ପରିଚିତ ଷ୍ଟାର ୱିକେଟ କିପର ତଥା ବ୍ୟାଟସମ୍ୟାନ ମହେନ୍ଦ୍ର ସିଂ ଧୋନୀଙ୍କ କ୍ରିକେଟ ଖେଳକୁ ନେଇ ତାଙ୍କ ପ୍ରସଂଶକଙ୍କ ମଧ୍ୟରେ ସବୁ ବେଳେ ଉତ୍ସାହ ଲାଗି ରହିଥାଏ । ବିଶ୍ୱକପ ପର ଠାରୁ କ୍ରିକେଟ ଜଗତରୁ ଦୂରେଇ ରହିଥିବା ଧୋନୀ କେବେ କ୍ରିଜକୁ ଓହ୍ଲାଇବେ ତାହାକୁ ନେଇ ତାଙ୍କ ପ୍ରସଂଶକଙ୍କ ମଧ୍ୟରେ ଯେମିତି ବ୍ୟାକୁଳତା ବଢିବାରେ ଲାଗିଲାଣି ।
ତେବେ ଧୋନୀ କ୍ରିକେଟ ଖେଳିବେ କି ନାହିଁ ତାହାକୁ ନେଇ ପ୍ରଶ୍ନବାଚୀ ସବୁ ସମୟରେ ସୃଷ୍ଟି ହେଉଥିବା ବେଳେ ଧୋନୀ ଏହି ବାବଦରେ ନିଜର ପ୍ରତିକ୍ରିୟା ରଖିଛନ୍ତି । ଧୋନୀ ନିଜ ପ୍ରତିକ୍ରିୟାରେ କହିଛନ୍ତି କି ତାଙ୍କୁ ଜାନୁଆରୀ ମାସ ପର୍ଯ୍ୟନ୍ତଏହି ବାବଦରେ କୌଣସି ବି ପ୍ରଶ୍ନ ପଚରା ନଯାଉ । ସମୟ ଆସିଲେ ସେ ନିଜେ ଏହି ବାବଦରେ ପ୍ରତିକ୍ରିୟା ଦେବା ସହ ଭବିଷ୍ୟତରେ ସେ କ୍ରିକେଟ ଖେଳିବେ କି ନାହିଁ ତାହା ଜଣାଇ ଦେବେ ।
ମୁମ୍ବାଇରେ ଅନୁଷ୍ଠିତ ହୋଇଥିବା ଏକ କାର୍ଯ୍ୟକ୍ରମରେ ଧୋନୀ ପଡିଆକୁ ଫେରିବେ କି ନାହିଁ ତାହାକୁ ନେଇ ପ୍ରଶ୍ନ ପଚାରିବାରୁ ସେ ଉତ୍ତରରେ ଏହା କହିଛନ୍ତି । ଜାନୁଆରୀ ମାସରେ ଧୋନୀ ୨୦୨୦ ଅନ୍ତରାଷ୍ଟ୍ରୀୟ କ୍ରିକେଟ ଜଗତକୁ ଫେରିବେ କି ନାହିଁ ତାହା ଜଣାପଡିନଥିବା ବେଳେ ସେ ଆଇପିଏଲର ଆଗାମୀ ସଂସ୍କରଣ ଖେଳିବା ନେଇ ସ୍ପଷ୍ଟ ହୋଇଛି । ଧୋନୀ ଆଇପିଏଲ ୨୦୨୦ରେ ଖେଳିବା ସହ ପୁଣି ଚେନ୍ନାଇ ସୁପରକିଙ୍ଗସର ପ୍ରତିନିଧିତ୍ୱ କରିବେ ବୋଲି ଜଣାପଡିଛି ।
