ନୂଆଦିଲ୍ଲୀ (ଏଟିଆର ବ୍ୟୁରୋ): କଂଗ୍ରେସର ନିର୍ବାଚନୀ ରାଲିରେ ପ୍ରିୟଙ୍କା ଗାନ୍ଧୀଙ୍କୁ ସ୍ୱାଗତ ଜଣାଇବାକୁ ପହଁଚିଲେ ବିଜେପି ନେତା । ଏହାକୁ ନେଇ ରାଜ୍ୟ ରାଜନୀତି ସରଗରମ ହୋଇ ଉଠିଛି । ଆଜ୍ଞା ହଁ ଉତ୍ତରପ୍ରଦେଶର ଏକ ନିର୍ବାଚନୀ ରାଲିରେ ଉତ୍ତରାଖଣଣ୍ଡର ଉଧମସିଂହ ନଗର ଜିଲ୍ଲାରେ ବରିଷ୍ଠ ବିଜେପି ନେତା ସୁରଶେ ଗଙ୍ଗୱାର ପ୍ରିୟଙ୍କା ଗାନ୍ଧୀଙ୍କୁ ସ୍ୱାଗତ କରିବାକୁ ପହଁଚିଛନ୍ତି ।
ଯେତେବେଳେ ପ୍ରିୟଙ୍କା ଗାନ୍ଧୀ ତାଙ୍କ ଫେସବୁକ୍ ଆକାଉଣ୍ଟରେ ବିଜେପି ନେତାଙ୍କ ସହିତ ଏକ ଫଟୋ ପୋଷ୍ଟ କଲେ ସେତେବେଳେ ରାଜନୀତିର ତାତି ଆହୁରୀ ବଢିଯାଇଥିଲା । କିଛି ସମୟ ମଧ୍ୟରେ ଏହି ଫଟୋକୁ ସାତ ହଜାରରୁ ଅଧିକ ଲୋକ ଦେଖିବା ସହିତ ବହୁତ ମାତ୍ରାରେ ସେୟାର ମଧ୍ୟ କରିଥିଲେ ।
ଉଧମସିଂହ ନଗର ବରା ନିବାସୀ ସୁରେଶ ଗଙ୍ଗୱାର ବିଜେପିର ଜଣେ ଜଣା ଶୁଣା ନେତା । ତାଙ୍କ ପିତା ଇଶ୍ୱରୀ ପ୍ରସାଦ ଗଙ୍ଗୱାର ବିଜେପିର ଜିଲ୍ଲା ପଞ୍ଚାୟତ ଅଧ୍ୟକ୍ଷ । ପ୍ରିୟଙ୍କା ଗାନ୍ଧୀଙ୍କ ନିର୍ବାଚନୀ ରାଲିରେ ସୁରେଶଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଦଳ ମଧ୍ୟରେ ହଇ ଚଇ ସୃଷ୍ଟି ହୋଇଛି ।
