ନୂଆଦିଲ୍ଲୀ (ଏଟିଆର ବ୍ୟୁରୋ): ଆଜି ଅପରାହ୍ନ ୪ଟାରେ ଦେଶବାସୀଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସୋମବାର ରାତିରେ ଚୀନ୍ ଆପ୍ସ ଉପରେ ପ୍ରତିବନ୍ଧ ଲଗାଇବାର ନିଷ୍ପତି ପରେ ଏହି ସମ୍ବନ୍ଧୀୟ କିଛି ବଡ ଘୋଷଣା କରିପାରନ୍ତି ପ୍ରଧାନମନ୍ତ୍ରୀ ବୋଲି କୁହାଯାଉଛି । ସେହିପରି ଅନଲକ୍ ୨ର ଗାଇଡଲାଇନ୍ ବି ଜାରି କରାଯାଇଛି, ତାକୁ ନେଇ ଜନତାଙ୍କୁ ଅପିଲ କରିପାରନ୍ତି ମୋଦି ।
ପୂର୍ବ ଲଦାଖରେ ଭାରତ ଓ ଚୀନ ସେନାଙ୍କ ମଧ୍ୟରେ ଚାଲିଥିବା ସୀମା ବିବାଦ ମଧ୍ୟରେ ସାରା ଦେଶରେ ଚୀନ୍ ବିରୋଧୀ ନାରା ଦେଖିବାକୁ ମିଳୁଛି । ଭାରତୀୟମାନେ ବାରମ୍ବାର ଚୀନ୍ ବସ୍ତୁ ଏବଂ ଆପ୍ସକୁ ବହିଷ୍କାର କରୁଛନ୍ତି । ଏହାରି ମଧ୍ୟରେ ସୋମବାର ଚୀନ୍ କୁ ଭାରତ ଏକ ବଡ ଡିଜିଟାଲ ସର୍ଜିକାଲ ଝଟକା ଦେବା ସହ ଟିକ୍ ଟକ୍ ସମେତ ୫୯ ଟି ଚାଇନା ଆପ୍ କୁ ବ୍ୟାନ କରି ଦେଇଛି ।
