କଟକ(ଏଟିଆର ବ୍ୟୁରୋ): ଡିସେମ୍ବର ୨୨ତାରିଖରେ ବାରବାଟୀ ଷ୍ଟାଡିୟମରେ ହେବାକୁ ଥିବା ଭାରତ-ୱେଷ୍ଟଇଣ୍ଡିଜ ଦିନିକିଆ ମ୍ୟାଚ ପାଇଁ କ୍ରିକେଟ ପ୍ରେମୀଙ୍କ ମଧ୍ୟରେ ପ୍ରବଳ ଉକ୍ରଣ୍ଠା ଦେଖିବାକୁ ମିଳିଛି ।
ଗୁରୁବାର ବାରବାଟୀ ଦିନିକିଆ ମ୍ୟାଚ ପାଇଁ ଅନଲାଇନ ଟିକେଟ ବିକ୍ରି ଆରମ୍ଭ ହୋଇଥିଲା, ଆରମ୍ଭ ହେବାର ମାତ୍ର ଗୋଟିଏ ଘଣ୍ଟା ମଧ୍ୟରେ ହିଁ ସରିଯାଇଥିଲା ଟିକେଟ । ଗୁରୁବାର ସକାଳୁ ହିଁ ଅନଲାଇନ ଟିକେଟ ପାଇଁ ଅପେକ୍ଷା କରି ରହିଥିଲେ କ୍ରିକେଟପ୍ରେମୀ । ତେବେ ସନ୍ଧ୍ୟା ୫ଟାରେ ଆରମ୍ଭ ହୋଇଥିଲା ବୁକିଂ । କେବଳ ଦୁଇଟି ୱେବସାଇଟରେ ବିକ୍ରି କରାଯାଇଥିଲା ଟିକେଟ, ପେଟିଏମ.କମ ଓ ଇନସାଇଡର.କମ ରେ ଅନଲାଇନ ବିକ୍ରି ହୋଇଥିଲା ଟିକେଟ ।
ମାତ୍ର ଘଣ୍ଟାଏ ଭିତରେ ୮୧୫୦ ଟିକେଟ ବିକ୍ରି ହୋଇଥିବା ଓଡ଼ିଶା କ୍ରିକେଟ ଆସୋସିଏସନ(ଓସିଏ) ପକ୍ଷରୁ ସୁଚନା ମିଳିଛି । ଯେଉଁ କ୍ରିକେଟପ୍ରେମୀ ଅନଲାଇନରେ ଟିକେଟ କିଣିପାରିନାହାନ୍ତି ସେମାନେ ଡିସେମ୍ବର ୧୯ ଏବଂ ୨୦ତାରିଖରେ ଷ୍ଟାଡିୟମ କାଓଣ୍ଟରରୁ ଟିକେଟ କିଣିପାରିବେ ।
