ବାଲେଶ୍ୱର,(ଏଟିଆର ବ୍ୟୁରୋ): ବାହାଘରରେ ବାଡିଆ ପିଟା । କଥାଟା ଠିକେ ଅଲଗା ଲାଗୁଥିଲେ ବି ଏକଦମ ସତ । ଯାହା ହାତରେ ଦେଖ ଥିଲା ଠେଙ୍ଗା ବାଡି ନଚେତ ପଥର । ମୁହାଁମୁହିଁ ହୋଇଥିଲେ ବର ଯାତ୍ରୀ ଓ କନ୍ୟାପକ୍ଷ । ଯିଏ ଯାହାକୁ ପାରୁଥିଲା ମନଇଛା ପିଟୁଥିଲା । ସବୁଠୁ ବଡ଼ କଥା ଥିଲା ଏହି ଗଣ୍ଡଗୋଳରେ ଅଯଥା ବନ୍ଧା ପଡିଥିଲା ବର । କନ୍ୟା ଘର ଲୋକେ ବରକୁ ଏକ ପ୍ରକାର ବନ୍ଦି କରି ରଖିଥିଲେ । ସିଧା କହିବାକୁ ଗଲେ ପରିସ୍ଥିତି ଏଭଳି ହୋଇଥିଲା ଯେ, ପୂରା ଅଞ୍ଚଳର ପାଲଟିଥିଲା ରଣକ୍ଷେତ୍ର । ଏଭଳି ଏକ ଅଭାନୀୟ ଘଟଣା ଏବେ ବାଲେଶ୍ୱରରେ ଚର୍ଚ୍ଚାର ବିଷୟ ହୋଇଛି । ଆୟୋଜିତ ଭୋଜିରେ ଖାଦ୍ୟ ସରିଯିବାରୁ ଏଭଳି ଘଟଣା ଘଟିଥିବା ଜଣାପଡିଛି ।
ରିପୋର୍ଟ ଅନୁସାରେ, ଡାଲଙ୍ଗ ଗ୍ରାମର ଅକ୍ଷୟ ଗିରିଙ୍କ ପୁଅର ବାହାଘର ନୂଆ ଗାଁ ଅଞ୍ଚଳରେ ଠିକ ହୋଇଥିଲା । ସେପଟେ କନ୍ୟା ପିତା ପ୍ରଫୁଲ ମହାନ୍ତି ବରଯାତ୍ରୀଙ୍କ ପାଇଁ ସମସ୍ତ ବନ୍ଦୋବସ୍ତ କରିଥିଲେ । ତେବେ ୧୦୦ଜଣ ବରଯାତ୍ରୀ ଆସିଥିବା ବେଳେ ମାତ୍ର ୩୦ଜଣ ଖାଇବା ପରେ ଆଉ ଖାଦ୍ୟ ନଥିଲା । ଯାହାକୁ ନେଇ ବରଯାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ପାଟିତୁଣ୍ଡ ଆରମ୍ଭ ହୋଇଥିଲା । ତେବେ ଏହି ପାଟିତୁଣ୍ଡ ଶେଷରେ ଉଗ୍ରରୂପ ନେଇଥିଲା । ମୁହାଁ ମୁହିଁ ହୋଇଥିଲେ ବରପକ୍ଷ ଓ କନ୍ୟାପକ୍ଷ । ଚାଲିଲା ଉଭୟଙ୍କ ମଧ୍ୟରେ ଘମାଘୋଟ ଲଢ଼େଇ । ଆକ୍ରମଣରେ ୭ଜଣ ଗୁରୁତର ଆହତ ହୋଇଥିବା ସୂଚନା ମିଳିଛି । ବାହାଘର ପରେ କନ୍ୟାଘର ଲୋକ ବରକୁ ଅଟକ ରଖିଥିବା ବେଳେ ପୁଲିସ ପହଞ୍ଚି ଘଟଣାର ତଦନ୍ତ କରୁଛି । ସେପଟେ ଏହି ଘଟଣା ଏବେ ସବୁଠି ଚର୍ଚ୍ଚାର ବିଷୟ ହୋଇଛି ।
