ଭୁବନେଶ୍ୱର (ଏଟିଆର ବ୍ୟୁରୋ ) ; ସୁନା ଝିଅ ଦୁତିକୁ ମିଳିଲା ପୁରସ୍କାର । ଦୂତି ପାଇବେ ଆଉ ୧.୫ କୋଟି ଟଙ୍କାର ପୁରସ୍କାର । ଏଭଳି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଇଣ୍ଡୋନୋସିଆର ଜାକର୍ତାରେ ଚାଲିଥିବା ଏସିଆନ ଗେମ୍ସରେ ଓଡିଆ ଝିଅ ଦୂତି ଚାନ୍ଦ ଦେଶ ପାଇଁ ଜିତିଛନ୍ତି ଆଉ ଏକ ରୌପ୍ୟ ପଦକ । ଗତକାଲି ଖେଳାଯାଇଥିବା ୨୦୦ ମିଟର ଦୌଡରେ ଦୂତି ଦ୍ୱିତୀୟ ସ୍ଥାନରେ ରହି ଦେଶ ପାଇଁ ରୌପ୍ୟ ପଦକ ଆଣି ପାରିଛନ୍ତି । ପୁର୍ବରୁ ଦୂତି ୧୦୦ ମିଟର ଦୌଡରେ ରୌପ୍ୟ ପଦକ ଜିତିଥିଲେ । ତେବେ ଏହାକୁ ମିଶାଇ ଦୂତିଙ୍କୁ ଏସୀୟ କ୍ରୀଡାରୁ ମୋଟ ଦୁଇଟି ରୌପ୍ୟ ପଦକ ମିଳିଛି । ଏହି ବିଜୟ ପାଇଁ ଦୂତିଙ୍କୁ ସାରା ଦେଶରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି । ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ଙ୍କ ସମେତ ବହୁ ବିଶିଷ୍ଠ ବ୍ୟକ୍ତି ମାନେ ଦୂତିଙ୍କୁ ଶୁଭେଚ୍ଚା ଜଣାଇଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଦୂତିଙ୍କ ପାଇଁ ଆଉ ଏକ ପୁରସ୍କାରର ଘୋଷଣା କରିଛନ୍ତି । ଦୁତିଙ୍କୁ ଆଉ ଦେଢ କୋଟି ଟଙ୍କାର ପୁରସ୍କାର ଦେବା ପାଇଁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ତେବେ ଦୂତି ପୁର୍ବରୁ ୧୦୦ ମିଟର ଦୌଡରେ ରୋପ୍ୟ ପଦକ ଜିତିଥିବାରୁ ତାଙ୍କୁ ପୁର୍ବରୁ ମଧ୍ୟ ଦେଢ କୋଟି ଟଙ୍କାର ପୁରସ୍କାର ଦେଇଥିଲେ ମୁଖ୍ୟମନ୍ତ୍ରୀ । ଦୂତିଙ୍କ ପାଇଁ ମୋଟ ୩ କୋଟି ଟଙ୍କାର ପୁରସ୍କାର ଘୋଷଣା କରିସାରିଲେଣି ରାଜ୍ୟ ସରକାର । ଖାଲି ସେତିକି ନୁହେଁ ଏହାସହ ଆଗାମୀ ଅଲମ୍ପିକ୍ସ ପାଇଁ ଦୂତିଙ୍କ ପ୍ରସ୍ତୁତି ନିମନ୍ତେ ସମସ୍ତ ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ଜଣାପଡିଛି । ନିଜ କ୍ରିଡା ଜୀବନରେ ବହୁ ସଂଘର୍ସ ସହିଥିବା ଦୂତି ଆଜି ନିଜକୁ ପ୍ରମାଣ କରାଇଥିବା ବେଳେ ତାଙ୍କ ପାଇଁ ଓଡିଶା ଗର୍ବ ଅନୁଭବ କରୁଛି । ଦୂତିଙ୍କ ସଫଳତା ପାଇଁ ସାରା ରାଜ୍ୟରେ ଖୁସିର ମାହୋଲ ଦେଖାଯାଇଛି ।
