ନୂଆଦିଲ୍ଲୀ, (ଏଟିଆର ବ୍ୟୁରୋ): ପୁଣି ଜମ୍ମୁ ଓ କାଶ୍ମିରରେ ମୁହାଁମୁହିଁ ସୁରକ୍ଷା କର୍ମୀ ଓ ଆତଙ୍କବାଦୀ । ଚାଲିଛି ଜବରଦସ୍ତ ଅପରେସନ । ସୁରକ୍ଷା କର୍ମୀଙ୍କ ଗୁଳିରେ ୩ଜଣ ଆତଙ୍କବାଦୀ ନିହତ ହୋଇଥିବା ସୂଚନା ମିଳିଛି । ଏବେ ବି ସ୍ଥାନୀୟ ଅଞ୍ଚଳରେ ଗୁଳି ବର୍ଷା ହେଉଛି । ଶୁକ୍ରବାର ବିଳମ୍ବିତ ରାତିରୁ ସୁରକ୍ଷାକର୍ମୀ ଓ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିୟମ ଆରମ୍ଭ ହୋଇଥିଲା ।
ତେବେ ଘଟଣାରେ ଆହୁରି ୨ଜଣ ଆତଙ୍କବାଦୀ ଲୁଚି ରହିଥିବା ଅନୁମାନ କରାଯାଉଥିବା ବେଳେ ସେମାନଙ୍କୁ ଧରିବା ଲାଗି ଏବେ ବି କମ୍ବିଂ ଅପରେସନ ଜାରି ରହିଛି । ଚୌଗାମରେ ଏକ ଘରେ ଆତଙ୍କବାଦୀ ଲୁଚି ରହିଥିବା ନେଇ ଖବର ମିଳିଥିଲା । ଏହାପରେ ସେନାର ରାଷ୍ଟ୍ରୀୟ ରାଇଫଲ ଯବାନଙ୍କ ସହିତ ଜମ୍ମୁ ଓ କାଶ୍ମିର ପୁଲିସ ସେଠାରେ ମିଳିତ ଚଢ଼ାଉ କରିଥିଲେ । ତେବେ ଏଭଳି ପରିସ୍ଥିତିରେ ବାରମୂଲା ଓ କାଜିଗୁଣ୍ଡ ମଧ୍ୟରେ ରେଳ ଚଳାଚଳ ବନ୍ଦ ରହିଥିବା ବେଳେ ଇଣ୍ଟରନେଟ ସେବାକୁ ମଧ୍ୟ ବନ୍ଦ କରି ଦିଆଯାଇଛି ।
