ଭୁବନେଶ୍ୱର,(ଏଟିଆର ବ୍ୟୁରୋ): ଭିଆଇପି ଜୋନରୁ ବ୍ୟବସାୟୀ ନିଖୋଜ । କୁଆଡେ ଗଲେ କେଜାଣି ତାଙ୍କର କୌଣସି ଆତ୍ତାପତ୍ତା ନାହିଁ । ପରିବାର ଲୋକ ଖୋଜିଖୋଜି ତାଙ୍କୁ ନୟାନ୍ତ ହେଲେଣି । ଏପଟେ ମାମଲା ବି ଥାନାରେ ପହଞ୍ଚିଛି । ତଥାପି କୌଣସି ସୁଫଳ ମିଳିନାହିଁ । ନିଖୋଜ ବ୍ୟବସାୟୀଙ୍କ ନାଁ କୈଳାଶ ରାମ ସରାଫ । ବୟସ ୫୩ ।
ମିଳିଥିବା ରିପୋର୍ଟ ଅନୁସାରେ, ଲକ୍ଷ୍ମୀସାଗର ଥାନା ଅନ୍ତର୍ଗତ ଝାରପଡ଼ାର ଜଗନ୍ନାଥ ଆପାର୍ଟମେଣ୍ଟରେ ରହୁଥିବା କୈଳାଶଙ୍କର ସହିଦନଗରରେ ଏକ ଫୁଲ ଦୋକାନ ରହିଛି । ଦୋକାନରେ କୈଳାଶ ଗତ ୨୭ତାରିଖ ଦିନ ବସିଥିଲେ । ତେବେ ରାତି ପ୍ରାୟ ୯ଟା ହେବ ପରିଶ୍ରା କରିବାକୁ ସେ ବାହାରକୁ ଯାଇଥିଲେ । ଏହାପରେ ସେ ଆଉ ଫେରିନଥିବା ଦୋକାନର ଅନ୍ୟ କର୍ମଚାରୀମାନେ ଜଣାଇଛନ୍ତି । ତେବେ ସେ କୁଆଡେ ଗଲେ ଓ କାହା ସହ ଗଲେ ସେନେଇ କୌଣସି ସୂଚନା ନମିଳିବା ପରେ ବାଧ୍ୟ ହୋଇ ପରିବାର ଲୋକେ ଏନେଇ ସହିଦନଗର ଥାନାରେ ଜଣାଇଥିଲେ ।
ପୁଲିସ ମିସିଂ ରିପୋର୍ଟ ଫାଇଲ କରି ବାଣୀବିହାର ଛକରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିଛି । ତଥାପି କୈଳାଶଙ୍କର କୌଣସି ପତ୍ତା ମିଳିନାହିଁ । ସେପଟେ ପରିବାର ଲୋକଙ୍କ କହିବାନୁସାରେ, ସାମାନ୍ୟ ମାନସିକ ସମସ୍ୟା କୈଳାଶଙ୍କର ରହିଛି । ତେବେ ଯଦି କୌଣସି ବ୍ୟକ୍ତି କୈଳାଶଙ୍କର ଖୋଜଖବର ପାଆନ୍ତି ତେବେ ତୁରନ୍ତ ୯୫୫୬୧୬୦୧୩୭ରେ ଯୋଗାଯୋଗ କରିବାକୁ ଅନୁରୋଧ କରିଛନ୍ତି ତାଙ୍କ ପୁଅ ଉତ୍ତମ ।
