ଭୁବନେଶ୍ୱର,(ଏଟିଆର ବ୍ୟୁରୋ): କାଳବୈଶାଖୀ ତାଣ୍ଡବ ରଚିଛି । ଏଥିଯୋଗୁଁ ବିଭିନ୍ନ ସ୍ଥାନରେ ଅନେକ କ୍ଷୟକ୍ଷତି ହୋଇଥିବା ବେଳେ ବାଦ ପଡିନି ରେଳ ସେବା । ବିଭିନ୍ନ ସ୍ଥାନରେ ଟ୍ରେନ ଚଳାଚଳ ବାଧାପ୍ରାପ୍ତ ହୋଇଛି । ଅତ୍ୟଧିକ ପବନ ବହିବା ଯୋଗୁ ଟ୍ରେନ ଲାଇନ ଉପରେ ତା’ର ଛିଡି ପଡିଛି । କେବଳ ଏତିକି ନୁହେଁ ବହୁ ସ୍ଥାନରେ ଫେଲ ମାରିଛି ସିଗ୍ନାଲ ବ୍ୟବସ୍ଥା ।
ଭୁବନେଶ୍ୱର ଲିଙ୍ଗରାଜ ଷ୍ଟେସନରେ ତ’ ଟ୍ରେନ ଲାଇନ ଉପରେ ତାର ଛିଡି ଝୁଲୁଥିବା ଦେଖିବାକୁ ମିଳିଛି । ଫଳରେ କଟକ-ପୁରୀ ସଟଲ ଟ୍ରେନ ଅଟକି ରହିଛି । ଦୀର୍ଘ ଅଢ଼େଇଘଣ୍ଟା କାଳ ବର୍ଷ ଓ ଘଡଘଡିରେ ଅପେକ୍ଷା କରିବା ପରେ ଶେଷରେ ବାଧ୍ୟ ହୋଇ ଯାତ୍ରୀ ଚାଲିଚାଲି ଷ୍ଟେସନକୁ ଆସିଛନ୍ତି । ଟ୍ରେନ ସିଗ୍ନାଲ ଫେଲ ମାରିବା ପରେ ଭଦ୍ରକ-ଭୁବନେଶ୍ୱର-ପୁରୀ ରୁଟରେ ଟ୍ରେନ ଚଳାଚଳ ବିଳମ୍ବ ହୋଇଥିବା ରେଳବିଭାଗ ପକ୍ଷରୁ କୁହାଯାଇଛି । ଏଥିପାଇଁ ଯାତ୍ରୀମାନେ ବହୁ ହଇରାଣ ହରକତ ହୋଇଛନ୍ତି ।
