ନିକଟରେ ରିଲିଜ୍ ହୋଇଛି ‘ସଞ୍ଜୁ’ର ଟିଜର୍ । ରଣବୀର କପୁରଙ୍କ ନିଚ୍ଛକ ଅଭିନୟ ଦର୍ଶକଙ୍କୁ କିମିଆଁ କରିଛି । ମାତ୍ର ଦିନକ ପୂର୍ବରୁ ରିଲିଜ୍ ହୋଇଥିବା ଏହି ଟିଜରକୁ ୟୁଟ୍ୟୁବରେ ଦୁଇ କୋଟିରୁ ଅଧିକ ଦର୍ଶକ ପସନ୍ଦ କରିଛନ୍ତି ।
ଅତୀତରେ ‘ମୁନ୍ନା ଭାଇ ଏମ୍ ବିବି ଏସ୍’, ‘ଲଗେ ରହୋ ମୁନ୍ନା ଭାଇ’ ଭଳି ଫିଲ୍ମରେ ନିର୍ଦ୍ଦେଶନା ଦେଇଥିଲେ ରାଜ୍ କୁମାର ହିରାନୀ । ଏଥର ମୁନ୍ନା ଭାଇଙ୍କ ରିଏଲ୍ ଲାଇଫ୍ ଆଧାରିତ ଫିଲ୍ମ୍‘ସଞ୍ଜୁ’ର ମଧ୍ୟ ସେ ନିର୍ଦ୍ଦେଶନା ଦେଉଛନ୍ତି । ଟିଜରରେ ରଣବୀର କପୁର୍ ଅବିକଳ ସଞ୍ଜୟ ଦତଙ୍କ ଭଳି ଦେଖାଯାଉଛନ୍ତି । ମାତ୍ର ଦେଢ଼ ମିନିଟ ଏହି ଟିଜରରେ ସଞ୍ଜୟଙ୍କ କ୍ୟାରିୟର୍ ଆରମ୍ଭ ସମୟ ଠାରୁ ଜେଲ୍ ଯିବା ଦୃଶ୍ୟ ସବୁକିଛି ରହିଛି ।
ସଞ୍ଜୟ ଉଭୟ ଘଡ଼ି ଓ ହାତକଡ଼ି ପିନ୍ଧିଥିବା ଏବଂ ୩୦୮ ଗାର୍ଲଫ୍ରେଣ୍ଡ୍ ସହିତ ଡେଟିଂର ଦୃଶ୍ୟ ବି ରହିଛି । ଟିଜର୍କୁ ଦେଖିବା ପରେ ଫିଲ୍ମ୍ କିପରି ହୋଇଥିବ ଏବେଠାରୁ ଦର୍ଶକଙ୍କ ମନରେ ଏକ୍ସାଇଟମେଣ୍ଟ ଦେଖାଗଲାଣି । ଜଣେ ଅଭିନେତା ଜୀବନର ଭଲ ଓ ଖରାପ ଉଭୟ ସମୟକୁ ଏଥିରେ ସାମିଲ୍ କରାଯାଇଛି ।
‘ସଞ୍ଜୁ’ରେ ରଣବୀର୍ କପୁର୍ ସମେତ ଅନୁଷ୍କା ଶର୍ମା, ଦିୟା ମିର୍ଜା, ସୋନମ୍ କପୁର୍, ମନିଷା କୋରିଆଲା, ପରେଶ ରାୱଲ୍ ଓ ବିକ୍କି କୌଶଲ୍ ଭଳି ଷ୍ଟାର୍ ପ୍ରମୁଖ ଭୂମିକାରେ ଅଭିନୟ କରୁଛନ୍ତି । ଆସନ୍ତା ଜୁନ୍ ୨୯ରେ ଫିଲ୍ମଟି ରିିଲିଜ୍ ହେବାକୁ ସ୍ଥିର ହୋଇଛି ।
