ଆଠଗଡ (ଏଟିଆର ବ୍ୟୁରୋ); ଭୋଜି ନାଁ ଶୁଣିଲେ ପିଲାଙ୍କ ଖୁସି କହିଲେ ନସରେ । ପୂର୍ବରୁ ଯଦି ଏମାନେ ଭୋଜି କଥା ଶୁଣନ୍ତି ତେବେ ସେମାନେ ଦିନ ଗଣିବା ମଧ୍ୟ ଆରମ୍ଭ କରି ଦିଅନ୍ତି । ହେଲେ ସେହି ଭୋଜି ଯଦି ପିଲାଙ୍କ ପାଇଁ ବିପଦ ଆଣେ? ତେବେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ଆଠଗଡ ଅଞ୍ଚଳରେ । ଭୋଜିଖାଇ ଅସୁସ୍ଥ ହୋଇଛନ୍ତି ଶିଶୁ । ମିଳିଥିବା ସୂଚନା ମୁତାବକ କଟକ ଜିଲ୍ଳା ଆଠଗଡ ଥାନା ଅନ୍ତର୍ଗତ କଣ୍ଡରେଇ ଗ୍ରାମପଞ୍ଚାୟତର ପାର୍ବତୀପୁର ଗ୍ରାମରେ ଏହି ଅଘଟଣ ଘଟିଛି । ଗାଁରେ ହେଉଥିବା ଏକ ଭୋଜି ଖାଇବାକୁ ଯାଇ ପାଖାପାଖି ୪୦ଜଣ ଶିଶୁ ଅସୁସ୍ଥ ହୋଇପଡିଛନ୍ତି । ସେମାନଙ୍କୁ ଚିକିତ୍ସା ଲାଗି ହସପିଟାଲରେ ଭର୍ତ୍ତି କରାଯାଇଛି । ତେବେ କେମିତି ଓ କେଉଁ କାରଣରୁ ଏଭଳି ଘଟଣା ଘଟିଛି ସେନେଇ କିଛି ସ୍ପଷ୍ଟ ସୂଚନା ମିଳିନାହିଁ । ଏନେଇ ଅଧିକ ତଦନ୍ତ ଚଳାଇଛି ପୁଲିସ ।
