ଭୁବନେଶ୍ୱର (ଏଟିଆର ବ୍ୟୁରୋ): ଚଳିତବର୍ଷ ଭୁବନେଶ୍ୱର ଠାରେ ଅନୁଷ୍ଠିତ ହେବାକୁ ଯାଉଛି ୬୮ତମ ସର୍ବଭାରତୀୟ ପୋଲିସ ହକି ପ୍ରତିଯୋଗିତା ୨୦୧୯ । ଓଡ଼ିଶା ପୋଲିସ ପକ୍ଷରୁ ଆୟୋଜିତ ହେଉଥିବା ଏହି ପ୍ରତିଯୋଗିତା ଆସନ୍ତା ୧୬ରୁ ୨୪ତାରିଖ ପର୍ଯ୍ୟନ୍ତ ଚାଲିବ । ଏହି ପ୍ରତିଯୋଗିତା କଳିଙ୍ଗ ଷ୍ଟାଡିୟମରେ ଆୟୋଜିତ ହେଉଥିବା ବେଳେ ଏଥିରେ ରାଜ୍ୟ ପୋଲିସ ଓ କେନ୍ଦ୍ରୀୟ ବଳରୁ ପାଖାପାଖି ୨୫ଟି ଦଳ ଓ ପ୍ରାୟ ୫୦୦ ପ୍ରତିଯୋଗୀ ଅଂଶଗ୍ରହଣ କରିବେ ।
ଓଡିଶା ପୋଲିସ ଏହି ପ୍ରତିଯୋଗିତାକୁ ସର୍ବଭାରତୀୟ ପୋଲିସ କଣ୍ଟ୍ରୋଲ ବୋର୍ଡ ମାର୍ଗଦର୍ଶନରେ ଆୟୋଜନ କରୁଛି । ଲିଗ କମ ନକ ଆଉଟ ଆଧାରରେ ପ୍ରତିଯୋଗିତାଟି ଖେଳାଯିବ । ଏହାର କ୍ୱାଟର ଓ ସେମି ଫାଇନାଲ ମ୍ୟାଚ ଆସନ୍ତା ୨୧ଠାରୁ ଖେଳାଯିବାକୁ ଥିବା ବେଳେ ଏହାର ଫାଇନାଲ ମ୍ୟାଚ ଡିସେମ୍ବର ୨୪ରେ ଅନୁଷ୍ଠିତ ହେବ । ରାଜ୍ୟ ସରକାରଙ୍କ ସ୍ୱୀକୃତି ପ୍ରାପ୍ତ ମାକ୍ସଟ ‘ଓଲି’କୁ ଏହି ପ୍ରତିଯୋଗିତାର ମାକ୍ସଟ ରୂପେ ଗ୍ରହଣ କରାଯାଇଛି ।
