ଭୁବନେଶ୍ୱର (ଏଟିଆର ବ୍ୟୁରୋ): ଆଗକୁ ବିଧାନସଭାର ଅଧିବେଶନ ହେବାକୁ ଯାଉଛି । ତେବେ ରାଜ୍ୟରେ ଯେଉଁଭଳି ମାହାମାରୀ କରୋନା ଦିନକୁ ଦିନ ନିଜର କାୟା ବିସ୍ତାର କରିବାରେ ଲାଗିଛି ତାହା ସମସ୍ତଙ୍କ ପାଇଁ ମୁଣ୍ଡ ବିନ୍ଧାର କାରଣ ପାଲଟିଛି । ଅନେକ ବିଧାୟକ ଓ ମନ୍ତ୍ରୀ କରୋନା ସଂକ୍ରମିତ ହୋଇଥିବା ବେଳେ ଆଗକୁ ହେବାକୁ ଥିବା ବିଧାନସଭା ଅଧିବେଶନେ ଯେପରି ଏହି ସଂକ୍ରମଣ ନବ୍ୟାପିବ ସେଥିପାଇଁ ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଗାଇଡ ଲାଇନ ଜାରି କରାଯାଇଛି ।
ଅଧିବେଶନ ପୂର୍ବରୁ ସମସ୍ତ ବିଧାୟକଙ୍କ କୋଭିଡ ଟେଷ୍ଟ କରାଯିବ । ଏହି କୋଭିଡ ପରୀକ୍ଷା ଆସ୍ତା ୨୭ ଓ ୨୮ ତାରିଖ ଦୁଇ ଦିନ ଧରି ହେବ । ପରୀକ୍ଷା ସକାଳ ସାଢେ ୭ଟାରେ ଆରମ୍ଭ ହୋଇ ୯ଟା ଯାଏଁ ଚାଲିବ । ଖାଲି ସେତିକି ନୁହେଁ ଅକ୍ଟୋବର ୪ରେ ପୁଣି ଆଉ ଥରେ ସମସ୍ତଙ୍କର କୋଭିଡ ଟେଷ୍ଟ କରାଯିବ । ଏହାସହ ବିଧାନସଭା ଅଧିବେଶନ ସମୟରେ କୌଣସି ବିଧାୟକ ଅସୁସ୍ଥ ଅନୁଭବ କଲେ ତେବେ ତାଙ୍କର ତୁରନ୍ତ ଆଣ୍ଟିଜେନ ଟେଷ୍ଟ କରାଯିବ ।
