କେନ୍ଦୁଝର ( ଏଟିଆର ବ୍ୟୁରୋ): ସାନ ଭାଇର ତୀର ମାଡରେ ବଡ ଭାଇ ଗୁରୁତର । ଏମିତି ଏକ ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ଘଟଗାଁ ଥାନା ପିପିଲିଆରେ । ଖବର ମୁତାବକ ଏହି ଗ୍ରାମର ବାବୁଲାଙ୍କ ପରିବାରରେ ସବୁ ବେଳେ ତାଙ୍କ ସ୍ତ୍ରୀଙ୍କ ସହିତ ସାନ ଭାଇ ଶୁକ୍ରା ମୁଣ୍ଡାଙ୍କର କଳି ଲାଗେ । କୌଣସି କାରଣ ନେଇ ଗତକାଲି ମଧ୍ୟ ଉଭୟ ଦିଅର ଭାଉଜଙ୍କ ମଧ୍ୟରେ କଳି ଲାଗିଥିଲା । ଉଭୟଙ୍କ ମଧ୍ୟରେ କଳି ତୀବ୍ର ହୋଇଥିଲା ।
ବଡଭାଇ ବାବୁଲା ମଧ୍ୟ ସେଠାରେ ଉପସ୍ଥିତ ଥିଲେ । ସେ ଉଭୟଙ୍କୁ ବୁଝାସୁଝା କରୁଥିଲେ । ମାତ୍ର କଳି ବଢିବାରୁ ଏଥିରେ ଉତକ୍ଷିପ୍ତ ହୋଇ ପଡିଥିଲା ଶୁକ୍ରା ମୁଣ୍ଡା । ସେ ବଡ ଭାଉଜକୁ ତୀର ମାରିଥିଲା । ମାତ୍ର ଏହି ସମୟରେ ବଡ ଭାଇ ମଝିକୁ ଆସି ଯାଇଥିଲା । ଫଳରେ ତୀରଟି ବଡଭାଇ ଛାତିରେ ଗଳି ଯାଇଥିଲା । ତେବେ ବାବୁଲାର ବଡ ଭଉଣୀ ବାବୁଲାକୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । ତେବେ ଏନେଇ ପୋଲିସ ଖବର ପାଇ ଡାକ୍ତରଖାନାରେ ପହଞ୍ଚି ତଦନ୍ତ ଆରମ୍ଭ କରିଛି ।
