ନୂଆପଡା ( ଏଟିଆର ବ୍ୟୁରୋ): ଭାଲୁ ବୁଲୁଛି ରାସ୍ତାରେ । ଲୋକେ ଆତଙ୍କିତ । ଏମିତି ଏକ ଘଟଣା ଦେଖିବାକୁ ମିଳିଛି ନୂଆପଡା ଜିଲ୍ଲା ଖରିଆର ରୋଡ ୧୯ ନଂ ୱାର୍ଡରେ । ଗତକାଲି ସନ୍ଧ୍ୟାରେ ଏହି ଘଟଣା ଦେଖିବାକୁ ମିଳିଥିଲା । ଯାହାକୁ ନେଇ ଏବେ ଉକ୍ତ ଅଞ୍ଚଳରେ ଲୋକେ ଭୟବିତ ହୋଇ ପଡିଛନ୍ତି । ଏମିତି କି ଲୋକେ ଘରୁ ବାହାରକୁ ବାହାରୁ ନାହାନ୍ତି ଭାଲୁ ଭୟରେ । ଖବର ପାଇ ବନ ବିଭାଗ କର୍ମଚାରୀ ପହଞ୍ଚି ଭାଲୁଟିକୁ ଘଉଡାଇବା ପାଇଁ ଚେଷ୍ଟା କରିଥିଲେ ।
ମାତ୍ର ଭାଲୁଟି ବନ ବିଭାଗ କର୍ମଚାରୀଙ୍କୁ ମଧ୍ୟ ଭୟ ଦେଖାଇଥିଲା । ପରେ ବହୁ ସମୟର ପ୍ରଚେଷ୍ଟା ପରେ ଭାଲୁଟି ବଣ ଭିତରକୁ ଯାଇଥିଲା । ତେବେ ଭାଲୁଟି ପୁଣି ସହର ମୁହାଁ ହୋଇପାରେ ବୋଲି ସାଧାରଣ ଲୋକ ଅନୁମାନ କରୁଛନ୍ତି । ଭାଲୁ ସହିତ ଦୁଇଟି ଛୋଟ ଛୁଆ ମଧ୍ୟ ରହିଥିବାର ଦେଖିବାକୁ ମିଳିଥିଲା । ଭାଲୁ ଉପଦ୍ରବକୁ ନଜରରେ ରଖି ବନ ବିଭାଗ ପକ୍ଷରୁ ଲୋକ ମାନେ ସଚେତନ ରହିବା ପାଇଁ ପରାମର୍ଶ ଦିଆଯାଇଛି ।
