ଭୁବନେଶ୍ୱର (ଏଟିଆର ବ୍ୟୁରୋ ) ; ପୁଣି ଗିରଫ ହେଲେ ସିସୋର ଚିଟଫଣ୍ଡ ମାମଲାର ଅଭିଯୁକ୍ତ ଶୁଭଙ୍କର ନାୟକ । ମହିଳାଙ୍କ ଘରେ ପଶି ଆସାଧାଚରଣ ଓ ମହିଳାଙ୍କ ପୁଅକୁ ମାଡ ମାରିବା ଅଭିଯୋଗରେ ଶୁଭଙ୍କର ନାୟକଙ୍କୁ ଗତକାଲି ରାତିରେ ଗିରଫ କରିଛି ଖାରବେଳ ନଗର ଥାନା ପୋଲିସ । ସୂଚନା ଅନୁସାରେ ,ଚନ୍ଦ୍ରମା ଆପାର୍ଟମେଣ୍ଟ ରେ ରହୁଥିବା ଜଣେ ମହିଳାଙ୍କୁ ବେଶ କିଛିଦିନ ହେବ ହଇରାଣ କରିଥିଲେ ଶୁଭଙ୍କର । ବାଟରେ ଘାଟରେ ସବୁଠି ମହିଳାଙ୍କୁ ଶୁଭଙ୍କର କରୁଥିଲେ ଟାର୍ଗେଟ । ଏମିତି କି ମହିଳାଙ୍କୁ ପ୍ରେମ ନିବେଦନ କରିଥିଲେ ଶୁଭଙ୍କର । କିନ୍ତୁ ଗତକାଲି ରାତିରେ ଶୁଭଙ୍କର ସବୁ ସୀମା ଟପିଯାଇଥିଲେ । ଗତକାଲି ରାତିରେ ଶୁଭଙ୍କର ମହିଳାଙ୍କ ଘରକୁ ଯାଇ ତାଙ୍କୁ ଦୁର୍ବ୍ୟବହାର କରିବା ସହ ତାଙ୍କ ପୁଅକୁ ମଧ୍ୟ ମାଡ ମାରିଥିଲେ । ଏହାପରେ ମହିଳା ଜଣକ ଖାରବେଳନଗର ଥାନାରେ ଶୁଭଙ୍କର ନାମ ରେ ଅଭିଯୋଗ କରିଥିଲେ । ପୋଲିସ ଶୁଭଙ୍କରକୁ ବହୁ ସମୟ ପଚରାଉଚରା କରିବା ପରେ ଗିରଫ କରିଥିବା ଜଣା ପଡିଛି । ଅନ୍ୟପଟେ ଶୁଭଙ୍କର ୨୦୧୪ ମସିହାରେ ସିସୋର ଚିଟଫଣ୍ଡ ଠକେଇ ମାମଲାରେ ଗିରଫ ହୋଇଥିଲେ । ପରେ ତାଙ୍କୁ ହାଇକୋର୍ଟ ଗତବର୍ଷ ଅଗଷ୍ଟ ୧ ତାରିଖରେ ଜାମିନ ଦେଇଥିଲେ ।
