ଗଞ୍ଜମ(ଏଟିଆର ବ୍ୟୁରୋ): ଦିନକୁ ଦିନ ରାଜ୍ୟରେ ନକଲି ଜିନିଷ ତିଆରି କାରଖାନା ବଢିବାରେ ଲାଗିଛି । ଗତ କିଛି ଦିନ ତଳେ କଟକ ଓ ଭୁବନେଶ୍ୱର ନକଲି ତେଲ ଓ ଘିଅ କରଖାନା ଠାବ ହୋଇଥିଲା । ତେବେ ଗତକାଲି ରାତିରେ ଦିଗପହଣ୍ଡି ଆଇଆଇସି ବୀରପାଟଣା ଗ୍ରାମରେ ଥିବା ଏକ କୁକୁଡା ଫାର୍ମରେ ନକଲି ବିଦେଶୀ ମଦ ତିଆରି ହୋଉଥିବାର ଖବର ପାଇଥିଲେ । ବିଳମ୍ବ ନକରି ଆଇଆଇସି କୁକୁଡା ଫାର୍ମ ଉପରେ ଚଢାଉ କରିଥିଲେ ।
ଚଢାଉ ସମୟରେ ୪୬ଟି କାର୍ଟୁନରେ ଭର୍ତି ହୋଇଥିବା ୨୦୨୮ଟି ନକଲି ବିଦେଶୀ ମଦ ବୋତଲ, ୮୦ ଲିଟର ୩୬୪ଟି ପ୍ରିପେର ଜାର, ୨୮୦ ଲିଟର ସ୍ପିରିଟ, ମେସିନ, ୨ବସ୍ତା ଲେବୁଲ, ୨ବସ୍ତା ଖାଲି ବୋତଲ, ୧୦ବସ୍ତା ଠିପି, ବହୁଳ ପରିମାଣରେ ମଦ ତିଆରି ସାମଗ୍ରୀ ଜବତ କରିଛି ପୋଲିସ । ଏହା ସହ ନକଲି ମଦ ବେଝେଇ ଏକ ଅଟୋ କୁ ମଧ୍ୟ ଜବତ କରିବା ସହ ୪ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତ ମାନେ ହେଲେ ହୃଷିକେଶ ଗୌଡ଼, ପ୍ରଦୀପ ସାହୁ, ଟୁଟୁ ଦାସ, ଦଣ୍ଡପାଣି ଡାକୁଆ । ପୋଲିସ ଅଭିଯୁକ୍ତ ମାନଙ୍କ ଠାରୁ ଆଉ କେଉଁଠି ଏଭଳି ନକଲି କରାଖାନା ଅଛି ସେ ବିଷୟରେ ଜାଣି ବାକୁ ଚେଷ୍ଟା କରୁଛି ।
