ଭୁବନେଶ୍ୱର(ଏଟିଆର ବ୍ୟୁରୋ): ବଡଧରଣ ଡକାୟତି ଯୋଜନା କରୁଥିବା ବେଳେ ସହିଦ ନଗର ପୋଲିସ ୬ଜଣ ଯୁବକଙ୍କୁ ଗିରଫ କରିଛି । ସୂଚନା ଅନୁସାରେ ରବିବାର ବିଳମ୍ବିତ ରାତିରେ ୬ଜଣ ଡକାୟତ ଭିଏସଏସ ନଗର ସାଣ୍ଡିସ ସ୍କୋୟାର ନିକଟରେ ଡକାୟତି ଯୋଜନା କରୁଥିଲେ । ଖବର ପାଇ ସହିଦ ନଗର ପୋଲିସର ଏକ ଟିମ ସେଠାରେ ଚଢାଉ କରିଥିଲା । ତେବେ ଚଢାଉ ସମୟରେ ସେଠାରୁ ଖସି ପଳାଇବା ପାଇଁ ଡକାୟତ ମାନେ ଉଦ୍ୟମ କରିଥିଲେ । ବେଶ କିଛି ସମୟର ଛକାପଞ୍ଝା ପରେ ଡକାୟତ ମାନଙ୍କୁ କାବୁ କରିବାରେ ସଫଳ ହୋଇଥିଲା ସହିଦ ନଗର ପୋଲିସ ।
ଗିରଫ ହୋଇ ଥିବା ଡକାୟତ ମାନେ ହେଲେ ନୂଆପଲ୍ଲୀ ତାରିଣୀ ବସ୍ତିର ନନ୍ଦୁସୂର୍ୟ୍ୟ ବାହାଦୂର, ଖାରବେଳନଗର ଆୟୁର୍ବେଦିକ କଲୋନିର ଦୀପ୍ତିରଂଜନ ସ୍ବାଇଁ , ମାଳିସାହି ମସଜିଦ୍ କଲୋନିର ସେକ୍ ଆଜିଲାମ୍, ରେଣ୍ଟାଲ୍ କଲୋନି ସହିଦ ଲକ୍ଷ୍ମଣ ନାୟକ ସାହିର କାଳୁ ନାୟକ, ପ୍ରୀତମ ନାୟକ ଏବଂ ଶ୍ରୀଧର ଦାସ । ଗିରଫ ହୋଇଥିବା ୬ଜଣ ଡକାୟତଙ୍କ ପାଖରୁ ଦୁଇଟି ବାଇକ ଓ ଗୋଟିଏ ଖଣ୍ଡା ଜବତ କରିଛି ପୋଲିସ । ଏହା ସହ ଡକାୟତ ମାନେ ପୋଲିସ ଆଗରେ ନୂଆପଲ୍ଲୀ, ସହିଦ ନଗର, ଖଣ୍ଡଗିରି, ଚନ୍ଦ୍ରଶେଖର ପୁର ଅଞ୍ଚଳରେ ଲୁଟୁ କରିଥିବାର କଥା ସ୍ୱୀକାର କରିଛନ୍ତି । ସହିଦ ନଗର ପୋଲିସ ଏକ ମାମଳା ରୁଜୁ କରି ୬ଜଣ ଅଭିଯୁକ୍ତଙ୍କୁ କୋର୍ଟ ଚାଲାଣ କରିବା ସହ ଏହି ଗ୍ୟାଙ୍ଗରେ ଆଉ କିଏ ସାମିଲ ଅଛି ତାହାର ତଦନ୍ତ କରୁଛି ।
