ଆନ୍ଦପୁର,(ଏଟିଆର ବ୍ୟୁରୋ): ବିଚ ବଜାରରେ ଫୁଟିଲା ଗୁଳି । ଟାର୍ଗେଟରେ ଥିଲେ ବ୍ୟବସାୟୀ । ତେବେ ଯଦିଓ ଗୁଳିମାଡ଼ରେ ଅଳ୍ପକେ ବ୍ୟବସାୟୀ ଜଣଙ୍କ ବର୍ତ୍ତି ଯାଇଛନ୍ତି ତଥାପି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି । ଘଟଣା ଘଟିଛି କେନ୍ଦୁଝର ଜିଲ୍ଲା ଘସିପୁରା ଥାନା ବେଲବାହାଳି ଅଞ୍ଚଳରେ । ସେପଟେ ଘଟଣାକୁ ଗୁରୁତର ସହ ନେଇ ପୁଲିସ ତନାଘନା ଚଳାଇଛି ।
ପୂର୍ବ ଶତ୍ରୁତାକୁ ନେଇ ଏହି ଗୁଳିମାଡ ହୋଇଥିବା ଅନୁମାନ କରାଯାଉଥିବା ବେଳେ ଖୁବ ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପୁଲିସ ସୂଚନା ଦେଇଛି । ରିପୋର୍ଟ ଅନୁସାରେ, ଅପରାହ୍ଣରେ ନିରଞ୍ଜନ ସାହୁ ନାମକ ବ୍ୟବସାୟୀ ନିଜ ସ୍କର୍ପିଓରେ ଯାଉଥିବା ବେଳେ ଅଚାନକ ଦୁର୍ବୃତ୍ତମାନେ ଗୁଳିମାଡ଼ କରିଥିଲେ । କେହି କିଛି ବୁଝିବା ପୂର୍ବରୁ ଅନ୍ଧାଧୂନ ଗୁଳିମାଡ କରି ଦୁର୍ବୃତ୍ତମାନେ ଚମ୍ପଟ ମାରିଥିଲେ । ଗୁଳିମାଡ଼ରେ ସ୍କର୍ପିଓର ପଛପଟ କାଚ ଭାଙ୍ଗି ଯାଇଛି । ବ୍ୟବସାୟୀକ ଶତୃତାକୁ ନେଇ ଏପରି ଘଟିଥାଇ ପାରେ ବୋଲି ପୁଲିସ ସନ୍ଦେହ କରୁଛି ।
