ଭୁବନେଶ୍ୱର,(ଏଟିଆରବ୍ୟୁରୋ): ହଷ୍ଟେଲରୁ ଜଣେ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି ପୁଲିସ । ନୟାପଲ୍ଲୀ ଥାନା ନୂଆସାହି ଅଞ୍ଚଳରେ ଥିବା ପ୍ଲଟ ନମ୍ବର ୧୮୨୦ରୁ ପୁଲିସ ମୃତଦେହକୁ ଜବତ କରିଛି । ମୃତ ଛାତ୍ରୀଙ୍କ ନାଁ ପ୍ରଜ୍ଞାପ୍ରୀୟଦର୍ଶନୀ ସାହୁ ଘର ଯାଜପୁର ସୁକିନ୍ଦା ଅଞ୍ଚଳରେ । ତେବେ କାହିଁକି ଓ କେଉଁ ପରିସ୍ଥିତିରେ ପ୍ରଜ୍ଞାଙ୍କ ମୃତ୍ୟୁ ହୋଇଛି ସେନେଇ ଅଧିକ ଖୋଳତାଡ ଜାରି ରହିଛି ।
ସେପଟେ ପୋଷ୍ଟମର୍ଟମ ରିପୋର୍ଟ ମିଳିବା ପରେ ମୃତ୍ୟୁର କାରଣ ଜଣାପଡିବ ବୋଲି ପୁଲିସ କହିଛି । ରିପୋର୍ଟ ଅନୁସାରେ, ପ୍ରଜ୍ଞା ଆଜକୁ ବର୍ଷେ ହେବ ଏହି ହଷ୍ଟେଲରେ ରହୁଥିଲେ । ମୃତ୍ୟୁ ପୂର୍ବରୁ ସେ ଅନୁଗୁଳ ଯାଇଥିଲେ । କୁହାଯାଉଛି ଅନୁଗୁଳରେ ସେ ପାଠ ପଢ଼ୁଥିଲେ । ତେବେ ଅନୁଗୁଳରୁ ଫେରିବା ପରେ ଏଭଳି ଅଘଟଣ ଘଟିଛି । ସବୁଠୁ ବଡ଼ କଥା ହେଉଛି ପ୍ରଜ୍ଞାଙ୍କ ମୃତ୍ୟୁକୁ ନେଇ ଏବେ ଅନେକ ପ୍ରଶ୍ନ ଉଙ୍କି ମାରିଛି ।
ପୁଲିସ ରିପୋର୍ଟ ଅନୁସାରେ, ସନ୍ଧ୍ୟା ୭ଟା ବେଳେ ଛାତ୍ରୀ ଜଣଙ୍କ ଆତ୍ମହତ୍ୟା କରିଛନ୍ତି । ରେକର୍ଡ କହୁଛି ହଷ୍ଟେଲରେ ପ୍ରାୟ ଦେଢ଼ଶହରୁ ଅଧିକ ଛାତ୍ରୀ ରହୁଛନ୍ତି । ପ୍ରଜ୍ଞାଙ୍କ ମୃତଦେହ ଯେଉଁ ରୁମରୁ ମିଳିଛି ତା’ ପାଖରେ ୪ଟି ବେଡ ପଡିଛି । ଏହାର ମାନେ ପ୍ରଜ୍ଞାଙ୍କ ରୁମରେ ଆଉ ୪ଟି ପିଲା ରହୁଥିଲେ । ଏବେ ପ୍ରଶ୍ନ ଉଠିବା ସ୍ୱଭାବିକ, ପ୍ରଜ୍ଞା ଯଦି ଆତ୍ମହତ୍ୟା କଲେ ତେବେ ଆଉ କେହି କେମିତି ଜାଣି ପାରିଲେ ନାହିଁ? ହଷ୍ଟେଲ ୱାର୍ଡେନ ଯାଇଥିଲେ କୁଆଡେ? ସନ୍ଧ୍ୟା ୭ଟା ସମୟରେ ହଷ୍ଟେଲରେ ଗହଳୀଚହଳୀ ଥିବା ବେଳେ ପ୍ରଜ୍ଞାଙ୍କ ଚିକ୍ରାର ଆଉ କାହାରିକୁ ଶୁଭାଗଲାନି କେମିତି? ଏମିତି ଅନେକ ପ୍ରଶ୍ନ ଏବେ ସାଧାରଣରେ ଉଙ୍କି ମାରିଛି । ସବୁଠୁ ବଡ଼ କଥା ହେଉଛି ଘଟଣା ସମ୍ପର୍କରେ ହଷ୍ଟେଲ ଦାୟିତ୍ୱରେ ଥିବା ମହିଳାଙ୍କ ଉତ୍ତରର ତ’ କୌଣସି ତାଳମେଳ ରହୁନାହିଁ ।
ଏଠାରେ କହି ରଖିବାକୁ ଚାହୁଁଛୁ ଯେତେବେଳେ ଘଟଣା ସମ୍ପର୍କରେ ଖବର ସଂଗ୍ରହ କରିବାକୁ କେତେକ ସାମ୍ବାଦିକ ପହଞ୍ଚିଥିଲେ ଠିକ୍ ସେହି ସମୟରେ ଭିତରକୁ ଛାଡିବାକୁ ହଷ୍ଟେଲ ଦାୟିତ୍ୱରେ ଥିବା ମହିଳା ପ୍ରଥମେ ଆଇନ କାନୁନର ପାଠ ପଢ଼ାଇଥିଲେ । ପରେ ପୁଲିସର ହସ୍ତକ୍ଷେପ ପରେ ସାମ୍ବାଦିକମାନେ ଭିତରକୁ ଯାଇ ଖବର ସଂଗ୍ରହ କରିଥିଲେ । ପ୍ରଜ୍ଞା ଯଦି ଆତ୍ମହତ୍ୟା କଲେ ତେବେ ଗଣମାଧ୍ୟମକୁ ଭିତରକୁ ଛାଡିବାରେ ମ୍ୟାଡମଙ୍କ ଅସୁବିଧା ରହିଲା କେଉଁଠି? କେତେକ ଛାତ୍ରୀଙ୍କୁ ଗଣମାଧ୍ୟମରେ ଉତ୍ତର ରଖିବାକୁ କହି ନିଜେ କାହିଁ ଲୁଚିବାକୁ ଚେଷ୍ଟା କଲେ? ସେପଟେ ପୁଲିସ ମୃତ ଛାତ୍ରୀଙ୍କ ପରିବାର ଲୋକଙ୍କୁ ଖବର ଦେଇଛି । ପରିବାର ଲୋକେ ପହଞ୍ଚିବା ପରେ ମୃତଦେହ ହସ୍ତାନ୍ତର କରାଯାଇଥିବା ସୂଚନା ମିଳିଛି ।
