ସନ୍ଦେହଜନକ ଭାବେ କାର୍ ଭିତରୁ ମିଳିଲା ମହିଳାଙ୍କ ମୃତଦେହ

ଭୁବନେଶ୍ୱର (ଏଟିଆର ବ୍ୟୁରୋ):ରାସ୍ତା କଡରେ ଥୁଆ ହୋଇଥିବା କାର୍ ଭିତରେ ପଡି ରହିଛି ମହିଳାଙ୍କ ମୃତଦେହ । ଏଭଳି ଏକ ଅଭାବନୀୟ ଘଟଣା ଆଜି ସକାଳେ ଲିଙ୍ଗରାଜ ଥାନା ଅନ୍ତର୍ଗତ ସାମନ୍ତରାୟପୁର ହନୁମାନ ମନ୍ଦିର ନିକଟରେ ଦେଖିବାକୁ ମିଳିଛି । ଏହା ହତ୍ୟା ନା ଆତ୍ମହତ୍ୟା ସ୍ପଷ୍ଟ ହୋଇନଥିଲେ ମଧ୍ୟ ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି । ହେଲେ ମୃତମହିଳାଙ୍କ ପରିଚୟ ମିଳିପାରି ନାହିଁ ।

ଖବରମୁତାବକ, ଆଜି ସକାଳୁ ହନୁମାନ ମନ୍ଦିର ନିକଟବର୍ତ୍ତି ରାସ୍ତା କଡରେ ଏକ ଓଆର୦୨ଏଏମ୨୬୦୦ ନମ୍ବର ବିଶିଷ୍ଟ ଏକ କାର ଥୁଆ ହୋଇଥିବାର ଦେଖିବାକୁ ମିଳିଥିଲା । କାର୍ ଟିର ସମ୍ମୁଖ ଭାଗ ନଷ୍ଟ ହୋଇଯାଇଛି । ଆଗ ସିଟ୍ ରେ ଜଣେ ମହିଳାଙ୍କ ମୃତଦେହ ତଳକୁ ମୁହଁ କରି ପଡି ରହିଛି । ଏହାସହିତ କାର ଭିତରେ ଅନ୍ୟ କୌଣସି ବ୍ୟକ୍ତି ନଥିବା ଜଣାପଡିଛି । ସ୍ଥାନୀୟ ଲୋକେ ଏହାକୁ ହତ୍ୟା ବୋଲି ସନ୍ଦେହ କରୁଥିବା ବେଳେ ପୋଲିସକୁ ଜଣାଇଛନ୍ତି । ଘଟଣାସ୍ଥଳରେ ପୋଲିସ ପହଁଚି ତଦନ୍ତ ଆରମ୍ଭ କରିଛି ।