ପିପିଲି,(ଏଟିଆରବ୍ୟୁରୋ): ରାତି ଅଧରେ କାରରେ ନିଆଁ ଲଗାଇଲେ ଦୁର୍ବୃତ୍ତ । ପିପିଲି ବାଏପାସ ରୋଡ ଦାଣ୍ଡମୁକୁନ୍ଦପୁର ଛକରେ ଘଟିଛି ଏହି ଘଟଣା । ଗତକାଲି ରାତି ପ୍ରାୟ ୨ଟା ବେଳେ ଘଟିଥିବା ଏହି ଘଟଣାରେ କେଉଁମାନେ ଜଡିତ ଯଦିଓ ଜଣାପଡିନାହିଁ ତଥାପି ପିପିଲି ପୁଲିସ ଏହି ଘଟଣାର ଖୋଳତାଡ ଆରମ୍ଭ କରିଛି । ଏଭଳି ଘଟଣାପଛରେ ସ୍ଥାନୀୟ କେତେକ ଯୁବକଙ୍କ ହାତ ଥିବା ସନ୍ଦେହ କରାଯାଉଛି ।
ମିଳିଥିବା ରିପୋର୍ଟ ଅନୁସାରେ, ଏକ ନାନୋ କାରରେ ଭୁବନେଶ୍ୱରରେ ଏକ ଶିକ୍ଷାନୁଷ୍ଠାନର କେତେକ ଲୋକ ବିଜ୍ଞାପନ ସମ୍ପର୍କିତ ପୋଷ୍ଟର ମାରିବା ଲାଗି ଦାଣ୍ଡମୁକୁନ୍ଦପୁର ଅଞ୍ଚଳକୁ ଯାଇଥିଲେ । ତେବେ ସେଠାରେ ସେମାନେ ପୋଷ୍ଟର ଲଗାଉଥିବା ବେଳେ ଅଚାନକ୍ କେତେକ ଯୁବକ ସେଠାରେ ପହଞ୍ଚିଥିଲେ । ପ୍ରଥମେ ସେମାନେ ପୋଷ୍ଟର ମାରିବାକୁ ବାରଣ କରିବା ସହ ପାଟିତୁଣ୍ଡ କରିଥିଲେ ।
ଏହାପରେ ସେମାନେ ମାଡ଼ ମାରି ଭୁବନେଶ୍ୱରରୁ ଯାଉଥିବା ଲୋକଙ୍କ ନାନୋ କାରରେ ନିଆଁ ଲଗାଇ ଦେଇଥିବା ଜଣାପଡିଛି । ଘଟଣାରେ କାରଟି ସମ୍ପୂର୍ଣ୍ଣ ଜଳିଯାଇଛି । ଖବର ପାଇ ପିପିଲି ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ ପୁଲିସ ପହଞ୍ଚି ଏବେ ଘଟଣାର ଖୋଳତାଡ ଆରମ୍ଭ କରିଛି ।
