ମୟୂରଭଞ୍ଜ(ଏଟିଆର ବ୍ୟୁରୋ):ମୟୂରଭଞ୍ଜରେ ଘଟିଛି ଏକ ଅଭାବନୀୟ ଘଟଣା । ଜଳଖିଆ ଦୋକାନରୁ ଲାଗିଲା ନିଆଁ । ଘଟଣାଟି ଘଟିଛି ଉଦଳାର ଶ୍ରୀଦାମଚନ୍ଦ୍ରପୁର ଠାରେ । ସୂଚନା ମୁତାବକ ଆଜି ସକାଳେ ରବିନ୍ଦ୍ର ମହାନ୍ତ ନାମକ ଜଣେ ବ୍ୟକ୍ତି ନିଜ ଜଳଖିଆ ଦୋକାନରେ କାମ କରୁଥିବା ବେଳେ ସେଠାରେ ଥିବା ଗ୍ୟାସ ଲିକ୍ କରି ସେଥିରୁ ନିଆଁ ବାହାରିଥିଲା ।
ଏହି ନିଆଁ ସଙ୍ଗେ ସଙ୍ଗେ ଚାରି ଆଡେ ବ୍ୟାପି ଯାଇଥିଲା । ଦୋକାନ ଘରକୁ ଲାଗି ରହିଥିବା ତାଙ୍କ ଘରେ ମଧ୍ୟ ଲାଗିଯାଇଥିଲା ନିଆଁ । ଯାହା ଫଳରେ ଦୋକାନ ଓ ଘର ମଧ୍ୟରେ ଥିବା ଅନେକ ଆସବାପତ୍ର ଜଳିଯାଇଥିଲା । ଘର ମଧ୍ୟରେ ଥିବା ଅନେକ ପୁସ୍ତକ ଠାରୁ ଆରମ୍ଭ କରି ଜରୁରୀ କାଗଜପତ୍ର ଜଳିଯାଇଛି । ଖବର ପାଇ ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚିବା ସହ ନିଆଁକୁ ଆୟତ କରିଥିଲେ । ଏହି ଅଗ୍ନିକାଣ୍ଡରେ ରବିନ୍ଦ୍ରଙ୍କର ଝିଅ ସାମାନ୍ୟ ଆହତ ହୋଇଛନ୍ତି ।
