ମୟୁରଭଞ୍ଜ ( ଏଟିଆର ବ୍ୟୁରୋ): ଦୁର୍ବୃତ୍ତଙ୍କ ତୀରମାଡରେ ସୁପରଭାଇଜର ଆହତ। ଘଟଣାଟି ମୟୁରଭଞ୍ଜ ଜିଲ୍ଲାର ମୋରଡ଼ା ଥାନା ଅନ୍ତର୍ଗତ ଚିତ୍ରଡା ଫାଣ୍ଡି ଅଧିନ ଭୋଳାଗଡ଼ିଆ ନିକଟରେ ଘଟିଛି। ଏଠାରେ ଚାଲୁଥିବା ସୁବର୍ଣ୍ଣରେଖା କେନାଲନିର୍ମାଣ କାର୍ୟ୍ୟ କ୍ୟାମ୍ପରେ ଶୁକ୍ରବାର କିଛି ଦୁର୍ବୁତ୍ତ ଚୋରି କରୁଥିବା ସମୟରେ ସେହି କ୍ୟାମ୍ପର ସୁପରଭାଇଜର ପ୍ରତିବାଦ କରିବାରୁ ଉତକ୍ଷିପ୍ତ ହୋଇ ଦୁର୍ବୃତ୍ତମାନେ ତାଙ୍କୁ ମାରପିଟ କରିବା ସହିତ ତୀରମାଡ କରିଥିବା ମୋରଡ଼ା ଥାନାରେ ଅଭିଯୋଗ ହୋଇଛି।
ଆହତ ସୁପରଭାଇଜର ଜଣକ ହେଲେ ଶୁଳିଆପଦା ଥାନା ଅନ୍ତର୍ଗତ କୁସୁମୀ ଗ୍ରାମର ରତନ କୁମାର ଗିରି । ତୀରଟି ସୁପରଭାଇଜରଙ୍କ ଡାହାଣ ହାତରେ ଲାଗିଛି। ଘଟଣା ଘଟାଇ ଦୁର୍ବୁତ୍ତମାନେ ସେଠାରୁ ପଳାଇ ଯାଇଥିଲେ। ଆହତ ସୁପରଭାଇଜର ମାଲିକ ରାଜେନ୍ଦ୍ର ଗୁପ୍ତା ଙ୍କୁ ଏହି ଘଟଣା ସମ୍ପର୍କରେ ଜଣାଇବା ପରେ ସେ ରାତିରେ କ୍ୟାମ୍ପରେ ପହଞ୍ଚି ତାଙ୍କୁ ସେଠାରୁ ଉଦ୍ଧାର କରି ବାରିପଦାସ୍ଥିତ ପିଆରଏମ ମେଡିକାଲରେ ଭର୍ତ୍ତି କରାଇଥିଲେ । ଆକ୍ରମଣ ପଛର କାରଣ କଣ ସ୍ପଷ୍ଟ ହୋଇନାହିଁ ।
