ମୟୁରଭଞ୍ଜ,(ଏଟିଆର ବ୍ୟୁରୋ): ସାମାନ୍ୟ ଜମିବାଡି ଗଣ୍ଡଗୋଳକୁ କେନ୍ଦ୍ର କରି ଏକ ବିଭତ୍ସ ହତ୍ୟାକାଣ୍ଡ ଘଟିଛି । ପ୍ରଥମେ ତଣ୍ଟି ଚିପିିବା ପରେ ମନ ବୁଝିଲା ନାହିଁ ଯେ, ଶେଷରେ ମୁଣ୍ଡକୁ ପଥରରେ ଛେଚି ହତ୍ୟା କଲେ ଦୁର୍ବୃତ୍ତ । ଏଭଳି ଅମାନୁଷିକ ଘଟଣା ଘଟିଛି ମୟୁରଭଞ୍ଜ ଜିଲ୍ଲାର ଉଦଳା ଅଞ୍ଚଳର ପାତାସାହି ଗାଁରେ ।
ମୃତ ବ୍ୟକ୍ତିଙ୍କ ନାଁ ଜଗନ୍ନାଥ ଖଣ୍ଡୁଆଳ ବୋଲି ଜଣାପଡିଛି । ପୁଲିସ ମୃତଦେହକୁ ଜବତ କରି ଘଟଣାର ଖୋଳତାଡ ଆରମ୍ଭ କରିଛି । କୁହାଯାଉଛି ପଡୋଶୀ ୪ଜଣ ଜଗନ୍ନାଥଙ୍କୁ ଏଭଳି ନିର୍ମମ ଭାବେ ହତ୍ୟା କରିଛନ୍ତି । ମିଳିଥିବା ରିପୋର୍ଟ ଅନୁସାରେ, ଜାଗାବାଡିକୁ ନେଇ ଜଗନ୍ନାଥଙ୍କର ସମ୍ପର୍କ ସ୍ଥାନୀୟ କେତେକ ଲୋକଙ୍କ ସହ ଏତେଟା ଭଲ ନଥିଲା । ତେଣୁ ଗତକାଲି କାଲି ରାତିରେ ପଡୋଶୀ ୪ଜଣ ବ୍ୟକ୍ତି ଅଚାନକ ଜଗନ୍ନାଥଙ୍କ ଘରେ ପଶି ପାଟିତୁଣ୍ଡ କରିଥିଲେ ।
ପରେ ଏହା ଉଗ୍ରରୂପ ନେଇଥିଲା । ଜଗନ୍ନାଥଙ୍କ ତଣ୍ଟିକୁ ଏକ ଲୁଙ୍ଗିରେ ଚିପି ଧରିବା ସହ ମୁଣ୍ଡକୁ ପଥରରେ ଛେଚି ହତ୍ୟା କରିଥିଲେ ଦୁର୍ବୃତ୍ତ । ପୁଲିସ ଏବେ ଅଭିଯୁକ୍ତଙ୍କୁ ଧରିବା ଲାଗି ତନାଘନା ଆରମ୍ଭ କରିଛି ।
