ଭୁବନେଶ୍ୱର (ଏଟିଆର ବ୍ୟୁରୋ): ଆଉ ମାତ୍ର ଦୁଇ ଦିନ ପରେ ଦିଲ୍ଲୀରେ ହୋଇଥାନ୍ତା କୃଷି ସମାବେଶ । ମଙ୍ଗ ଧରି ଥାନ୍ତେ ମନ୍ତ୍ରୀ ପ୍ରଦୀପ ମହାରଥୀ । ଏଥି ପାଇଁ ତ ପୋଷ୍ଟର ବି ଛପା ସରିଥିଲା । କର୍ମୀଙ୍କୁ ଏକଜୁଟ୍ ହେବାକୁ ଆହ୍ୱାନ ବି ଦିଆଯାଇଥିଲା । ହେଲେ ହଠାତ୍ ବଦଳି ଗଲା ମୋଡ । କୃଷକଙ୍କ ହକ ପାଇଁ ଲଢେଇ କରି ଦିଲ୍ଲୀ ଯିବାକୁ ଅଣ୍ଟା ଭିଡିଥିବା କୃଷି ମନ୍ତ୍ରୀ ପ୍ରଦୀପ ମହାରଥୀଙ୍କ ମନ୍ତ୍ରୀପଦ ଚାଲିଗଲା । ପିପିଲି ପୀଡିତା ମାମଲାରେ ବିବାଦୀୟ ବୟାନ ହିଁ ତାଙ୍କ ପାଇଁ ମହଙ୍ଗା ପଡିଛି । ଯେଉଁଥିପାଇଁ ସେ ନିଜେ ମନ୍ତ୍ରୀ ପଦ ଛାଡିବାକୁ ବାଧ୍ୟ ହୋଇଛନ୍ତି । ତେବେ ଏହାକୁ ନେଇ ଏବେ ଆଲୋଚନା ଜୋର ଧରିଛି । ପ୍ରଶ୍ନ ଉଠିଛି ଅଚାନକ୍ ମନ୍ତ୍ରୀଙ୍କ ଇସ୍ତଫା କୃଷକ ସମାବେଶରେ କୌଣସି ପ୍ରଭାବ ପକାଇବନି ତ? ଏହା ସହିତ ଦିଲ୍ଲୀର ଏହି ସମାବେଶର ମଙ୍ଗ ଏବେ ଧରିବ କିଏ? ଏହାକୁ ନେଇ ଏବେ ରାଜନୈତିକ ମାହୋଲ ପୂରା ସରଗରମ ହୋଇ ଉଠିଛି ।
