ଭୁବନେଶ୍ୱର,(ଏଟିଆର ବ୍ୟୁରୋ): ଖୁବ ଶୀଘ୍ର ନୂଆ ଦଳ ଗଢ଼ିବାକୁ ଯାଉଛନ୍ତି ବୈଜୟନ୍ତ । ବିଜେଡିରୁ ବିତାଡିତ ହେବା ପରେ ଏବେ ବିଜେପି ମୋହ ଛାଡି ବୈଜୟନ୍ତ ନିଜ ଦଳ ଗଢ଼ିବା ଲାଗି ଫୁଲ ଦମରେ ଅଣ୍ଟା ଭିଡିଛନ୍ତି । ସବୁଠୁ ବଡ଼ କଥା ହେଉଛି ବିଜେଡି ପ୍ରତି ନାକ ଟେକୁଥିବା କର୍ମୀଙ୍କୁ ନେଇ ଏକ ଟିମ ଗଢ଼ିବାକୁ ଚାହିଁଛନ୍ତି ବୈଜୟନ୍ତ । ଏଥିପାଇଁ ପୂରା ବ୍ଲ୍ୟୁପ୍ରିଣ୍ଟ ପ୍ରସ୍ତୁତ ସରିଥିବା ଆଭାସ ମିଳିଛି । ନିକଟରେ ନିଜ ବହି ଉନ୍ମୋଚନ କରିବା ଅବସରରେ ଏଭଳି ସଂକେତ ଦେଇଛନ୍ତି ଖୋଦ ବୈଜୟନ୍ତ ପଣ୍ଡା ।
ସେ ଏହାମଧ୍ୟ ଠାର ଦେଇଥିଲେ କି ବିଜେପି ଓ କଂଗ୍ରେସ ସହ ବିଜେଡିର ଭିତିରି ବୁଝାମଣା ହୋଇଛି । ତେବେ ବିଜେଡିରୁ ବାହାରିବା ପରେ ବୈଜୟନ୍ତ ବହୁ ଅଞ୍ଚଳ ବୁଲି ନିଜର ଓଜନ ମାପିଛନ୍ତି । ଲୋକେ କେତେ ପସନ୍ଦ କରୁଛନ୍ତି କେତେ ନିଜର ଭାବୁଛନ୍ତି ତାହାର କଚା ଚିଠା ବାହାର କରିବା ପରେ ଏବେ ସେ ମଇଦାନକୁ ଓହ୍ଲାଇବାକୁ ପ୍ରସ୍ତୁତ ହୋଇଛନ୍ତି । ଆଉ ମାତ୍ର କେଇମାସ ପରେ ବାଜିବ ନିର୍ବାଚନ ବିଗୁଲ । ଏହା ପୂର୍ବରୁ ବୈଜୟନ୍ତଙ୍କ ଏହି ଦଳ କେତେଦୂର ଆଗକୁ ଯାଉଛି ତାହା ହିଁ ଦେଖିବାର ରହିଲା । ତେବେ ଏନେଇ ବୈଜୟନ୍ତଙ୍କ କୌଣସି ପ୍ରତିକ୍ରୀୟା ମିଳିପାରିନାହିଁ ।
