ଭୁବନେଶ୍ୱର (ଏଟିଆର ବ୍ୟୁରୋ); ପାଟକୁରା ନିର୍ବାଚନ ପାଇଁ ସଜବାଜ ହୋଇଛି ବିଜେଡି । ନିର୍ବାଚନ ତାରିଖ ଘୋଷଣା ହୋଇନଥିଲେ ସୁଦ୍ଧା ଦଳ ବିଜୟ ହେବା ପାଇଁ ଅଣ୍ଟା ଭିଡିଛି । ଏଠାରେ ବିଜେଡି ଏବଂ ବିଜୟଙ୍କ ସମ୍ମାନର ଲଢ଼େଇ ହେବାକୁ ଯାଉଛି । ଏଣୁ ବିଜେଡି ତୃଣମୂଳ ସ୍ତରରେ ଲୋକଙ୍କ ସହ ମିଶି ମନ କିଣିବା ପାଇଁ କରିଛି ନୂଆ ଗେମପ୍ଳାନ । ଦଳର ବହୁ ହେବିୱେଟଙ୍କ ନିର୍ବାଚନ ମଣ୍ଡଳୀର ବିଭିନ୍ନ ପଞ୍ଚାୟତ ଏବଂ ବ୍ଳକ ଦାୟିତ୍ୱ ଦେଇଛନ୍ତି ନବୀନ ପଟ୍ଟନାୟକ ।
ଗରଦପୁର ବ୍ଳକରେ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ସଂଯୋଜକ ଭାବେ କାର୍ୟ୍ୟ କରିବେ। ସେହିପରି ମନ୍ତ୍ରୀ ଅରୁଣ ସାହୁ ଓ ସାଧାରଣ ସମ୍ପାଦକ ତଥା ପୂର୍ବତନ ବିଧାୟକ ସଞ୍ଜୟ ଦାସବର୍ମାଙ୍କୁ ଡେରାବିଶ ବ୍ଲକ ଦାୟିତ୍ବ ପ୍ରଦାନ କରାଯାଇଛି। ଉଭୟ ମାର୍ଶାଘାଇ ଓ ଗରଦପୁର ବ୍ଲକ ଦାୟିତ୍ବରେ ରହିବେ ବିଧାୟକ ତଥା ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ। ସେହିଭଳି ମାର୍ଶାଘାଇ ୭ଟି ପଞ୍ଚାୟତ ପାଇଁ ମନ୍ତ୍ରୀ ପ୍ରଫୁଲ ମଲ୍ଲିକ ମଧ୍ୟ ତଦାରଖ କରିବେ ବୋଲି ଜଣାପଡ଼ିଛି।
ଜେନତେନ ପ୍ରକାର ବିଜେଡି ଏହି ଆସନକୁ ଅକ୍ତିଆର କରିବା ପାଇଁ ଚେଷ୍ଟା କରୁଛି । ଦଳରୁ ଅସନ୍ତୁଷ୍ଟ ଗୋଷ୍ଠୀଙ୍କୁ ଏକାଠି କରିବା ପାଇଁ ମଧ୍ୟ ଲାଗି ପଡିଛନ୍ତି । ନିର୍ବାଚନ ମଣ୍ଡଳୀର ବହୁ ନେତା ବିଜେଡି ଛାଡି ବିଜେପିରେ ଯୋଗ ଦେଇଥିଲେ । କିନ୍ତୁ ଏବେ ପୁଣିଥରେ ଦଳକୁ ବାଡୁଡୁଛନ୍ତି । ଦଳର ମୁଖ୍ୟ ଲକ୍ଷ୍ୟ ହେଉଛି ସାବିତ୍ରୀ ଅଗ୍ରୱାଲଙ୍କ ବିଜୟ ।
