ଭୁବନେଶ୍ୱର (ଏଟିଆର ବ୍ୟୁରୋ): ଗତକାଲି କଂଗ୍ରେସର ହାତ ଛାଡିଥିବା ତିର୍ତ୍ତୋଲର ବରିଷ୍ଠ ନେତା ରାଜକିଶୋର ବେହେରା ଆଜି ବିଜେପିର ହାତ ଧରିଛନ୍ତି । ଆଗକୁ ଉପନିର୍ବାଚନ ଆସୁଥିବାରୁ ଏବେ ରାଜ୍ରରେ ବିଭିନ୍ନ ରାଜନୈତିକ ଦଳଗୁଡିକରେ ଦଳ ବଦଳ ଦେଖିବାକୁ ମିଳିବ । ତେବେ ଗତକାଲି ସାମ୍ବାଦିକ ସମ୍ମୀଳନୀ ମଧ୍ୟମରେ ରାଜକିଶୋର ବେହେରା କଂଗ୍ରେସର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଥିବା ନେଇ ସୂଚନା ଦେଇଥିଲେ ।
ଏବେ ରାଜ୍ୟରେ କଂଗ୍ରେସର ସ୍ଥିତି ଅସ୍ଥିର ଥିବା ବେଳେ ଜଣେ ବରିଷ୍ଠ ନେତାଙ୍କର ଏହିଭଳି ସମୟରେ ଇସ୍ତଫା ରାଜ୍ୟ କଂଗ୍ରେସ ପାଇଁ ଏକ ବଡ ଝଟକା ହେବ । ଜଗତସିଂହପୁର ଜିଲ୍ଲାର ତିର୍ତ୍ତୋଲ ବିଧାନସଭା ଆସନ ପାଇଁ ଉପନିର୍ବାଚନର ଅବ୍ୟବହିତ ପୂର୍ବରୁ ଦଳ ଛାଡ଼ିଥିଲେ ରାଜକିଶୋର ବେହେରା ।
ସେ ନିଜର ଇସ୍ତଫା ପତ୍ର ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ନିରଂଜନ ପଟ୍ଟନାୟକଙ୍କ ନିକଟକୁ ପଠାଇ ଦେଇଥିଲେ । ତେବେ ବିଜେପିରେ ଯୋଗ ଦେବା ପରେ ବିଜେପିର ପ୍ରାର୍ଥୀ ଭାବରେ ତିର୍ତ୍ତୋଲରୁ ଉପନିର୍ବାଚନ ପ୍ରତିଦ୍ୱନ୍ଦ୍ୱିତା କରିପାରନ୍ତି ବୋଲି କଳ୍ପନାଜଳ୍ପନା ଜୋର ଧରିଛି ।
