ନବରଙ୍ଗପୁର (ଏଟିଆର ବ୍ୟୁରୋ): ବେକରେ ଦଉଡି ଦେଇ ଆତ୍ମହତ୍ୟା କରିଛନ୍ତି ଜଣେ ଅବସରପ୍ରାପ୍ତ ସବ୍-ଇନ୍ସପେକ୍ଟର । ତାଙ୍କ ଝୁଲନ୍ତା ମୃତଦେହ ଆଜି ସକାଳେ ଏକ ଗଛରୁ ଉଦ୍ଧାର କରାଯାଇଛି । ମୃତକ ଜଣଙ୍କ ହେଉଛନ୍ତି ପ୍ରେମ ଚନ୍ଦ୍ର ବାଗ । ତାଙ୍କ ଘର ନବରଙ୍ଗପୁର ସହରର ସେନାପତି ସାହିରେ ।
ଆଜି ସକାଳେ ସହରର ପୂର୍ତ୍ତ ବିଭାଗ ଡାକବଙ୍ଗଳା ପରିସର ମଧ୍ୟରେ ଥିବା ପାଚେରୀ ପାଖ ଗଛରେ ମୃତଦେହ ଝୁଲୁଥିବା ସ୍ଥାନୀୟ ଲୋକ ଦେଖିବାକୁ ପାଇଥିଲେ । ଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପୋଲିସ ପହଁଞ୍ଚିବା ସହିତ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ବ୍ୟବଚ୍ଛେଦ ରିପୋର୍ଟ ଆସିଲେ ଜଣା ପଡିବ ଏହା ହତ୍ୟା ନା ଆତ୍ମହତ୍ୟା ବୋଲି ପୋଲିସ ପ୍ରକାଶ କରିଛି । ତେବେ ପ୍ରେମଙ୍କର ୩ଜଣ ପୁଅଝିଅ ରହିଛନ୍ତି । ସେମାନଙ୍କ ମଧ୍ୟ ଜଣେ ଝିଅ ତାଙ୍କର ଶିକ୍ଷୟିତ୍ରୀ ଭାବେ କାର୍ଯ୍ୟରତ ଅଛନ୍ତି ।
