ଯାଜପୁର (ଏଟିଆର ବ୍ୟୁରୋ ) ; ସଇତାନ ସାଜିଲା ପୁଅ । ଜମି ବାଡି କଳହକୁ କେନ୍ଦ୍ର କରି ବାପାର ହତ୍ୟା କଲା ପୁଅ । ପୁଅର ଠେଙ୍ଗା ମାଡରେ ଚାଲିଗଲା ବାପାର ଜୀବନ । ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲା ମଙ୍ଗଳପୁର ଥାନା ଅଧିନ କୁମାରସାହି ଗ୍ରାମରେ । ତେବେ ମୃତକ ଜଣକ ରାଧେଶ୍ୟାମ ବେହେରା ବୋଲି ଜଣା ପଡିଛି ।
ଜମିବାଡି ଭାଗବାଣ୍ଟ ବିବାଦକୁ ନେଇ ଆଜି ସକାଳ ସମୟରେ ପୁଅ ପ୍ରମୋଦ ଓ ବାପା ରାଧେଶ୍ୟାମଙ୍କ ମଧ୍ୟରେ ଝଗଡା ହୋଇଥିଲା । ତେବେ ଝଗଡା ଧୀରେ ଧୀରେ ବହୁତ ବଡ ହେବାରେ ଲାଗିଲା । ଉଭୟେ ଉଭୟଙ୍କୁ ଠେଙ୍ଗାରେ ଆକ୍ରମଣ ମଧ୍ୟ କଲେ । ଏହି ଝଗଡା ମଧ୍ୟରେ ପୁଅ ପ୍ରମୋଦ ର ଠେଙ୍ଗାମାଡ ସିଧା ଯାଇ ରାଧେଶ୍ୟାମଙ୍କ ମୁଣ୍ଡରେ ବାଜିଥିଲା ଫଳରେ ଘଟଣା ସ୍ଥଳରେ ରାଧେଶ୍ୟାମ ମୃତ୍ୟୁ ବରଣ କରିଥିଲେ । ଅନ୍ୟପଟେ ରାଧେଶ୍ୟମଙ୍କ ଠେଙ୍ଗା ମାଡରେ ପ୍ରମୋଦ ମଧ୍ୟ ଆହତ ହୋଇଛନ୍ତି । ତେବେ ରାଧେଶ୍ୟାମଙ୍କୁ ସଂଗେ ସଂଗେ ସ୍ଥାନୀୟ ଗୋଷ୍ଟି ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ପୋଲିସ ପୁଅ ପ୍ରମୋଦକୁ ଅଟକ ରଖି ପଚରାଉଚରା କରିବା ସହ ଘଟଣାର ତଦନ୍ତ କରୁଛି ।
