ଗଞ୍ଜାମ(ଏଟିଆର ବ୍ୟୁରୋ): ଗୋଟିଏ ଘରୁ ମିଳିଲା ୩ଟି ମୃତ ଦେହ । ଏଭଳି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଛତ୍ରପୁର ଥାନା ପାଲିଆ ଛତ୍ରପୁର ଗାଁରେ । ସୂଚନା ଅନୁସାରେ ଛତ୍ରପୁର ଗାଁରେ ରହୁଥିବା ଗୋଟିଏ ପରିବାରର ୩ଟି ମୃତ ଦେହ ମିଳିଛି । ଘର ଭିତରୁ ସ୍ୱାମୀ , ସ୍ତ୍ରୀ ଓ ଝିଅଙ୍କ ମୃତ ଦେହ ଉଦ୍ଧାର କରାଯାଇଛି । ମୃତକ ହୋଲ ବୃନ୍ଦାବନ ବେହେରା, ସ୍ତ୍ରୀ ଉର୍ମିଳା ବେହେରା ଓ ଝିଅ ସୁନିତ ବେହେରା । ବୃନ୍ଦାବନଙ୍କ ମୃତଦେହ ଝୁଲନ୍ତା ଅବସ୍ଥାରେ ମିଳିଥିବା ବେଳେ ସ୍ତ୍ରୀ ଓ ଝିଅଙ୍କ ମୃତ ଦେହ ତଳେ ପଡିଥିବାର ଦେଖିବାକୁ ମିଳିଛି ।
ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଘଟଣାସ୍ଥଳରେ ଗଞ୍ଜାମ ଏସପି ବ୍ରିଜସେ କୁମାର ରୟ ଓ ଛତ୍ରପୁର ଏସଡିପିଓ ଉପସ୍ଥିତ ରହି ତଦନ୍ତ କରୁଛନ୍ତି । ତେବେ କେଉଁ କାରଣରୁ ମୃତ୍ୟୁ ହୋଇଛି ତାହା ଜଣା ପଡି ନାହିଁ । ଗୋଟିଏ ଘରୁ ୩ଟି ମୃତ ଦେହ ମିଳିବାରୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି । ଅନ୍ୟପଟେ ଏହା ହତ୍ୟା ନା ଆତ୍ମହତ୍ୟା ତାହାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିବାରେ ଲାଗିଛି ।
